उच्च शिक्षामा दलित महिलाको पहुँच बढाउन ‘सासूको इच्छा, बुहारीलाई शिक्षा’

सिन्धुलीको तीनपाटन गाउँपालिकाले उच्च शिक्षामा दलित समुदायका महिलाको पहुँच अभिवृद्धि गर्न ‘सासूको इच्छा, बुहारीलाई शिक्षा’ कार्यक्रम सञ्चालनमा ल्याएको छ । 

गाउँपालिकाले पालिकाभित्रका तीन वटा सरकारी तथा सामुदायिक क्याम्पसमा स्नातक वा सोभन्दा माथिल्लो तहमा अध्ययन गरिरहेका र गर्न चाहने दलित महिला (छोरी तथा बुहारी) को क्याम्पस भर्ना र मासिक शुल्क आफैंले व्यहोर्ने कार्यक्रम सञ्चालनमा ल्याएको छ । 
पालिकाका प्रमुख प्रशासकीय अधिकृत सन्तोष घिमिरेले उक्त कार्यक्रमबाट लाभ लिन सरोकारवालालाई आग्रह गरेका छन् । उनका अनुसार ‘सासूको इच्छा, बुहारीलाई शिक्षा’ कार्यक्रममा सहभागी हुन बुहारी भए सासु र छोरी भए आमाले भर्ना गरिदिनुपर्छ । 

त्यस्तै, महिला अभिभावक परिवारमा नभएमा सगोल परिवारका अन्य महिला नातेदारले छोरी वा बुहारीलाई क्याम्पस भर्ना गर्न लैजानुपर्नेछ । तर, अभिभावक समेत नभएमा सम्बन्धित वडाको महिला वडा सदस्यले भर्ना गर्न लैजानुपर्ने र क्याम्पसले सोहीअनुरुप भर्ना गरिदिने व्यवस्था गरिएको छ । 

गाउँपालिकाले भर्ना हुँदाका बखतको फोटो अनिवार्य खिच्नुपर्ने जनाउँदै यसरी नियमानुसार भर्ना हुने दलित समुदायका छोरी, बुहारीको भर्ना शुल्क र मासिक शुल्क पालिकाको शिक्षा शाखामार्फत् निकासा माग गरिने जानकारी गराएको छ ।