हेटौँडामा डाक्टर कुटिएपछि बैतडीका चिकित्सक विक्षप्त

हेटौंडास्थित सन्चो अस्पतालमा कार्यरत डा.विकास थापा र डा.प्रशान्त विंडारीमाथि भएको सांघातिक आक्रमणको विरोधमा बैतडीका चिकित्सकहरु आन्दोलित भएका छन् । उनीहरुले उक्त घटनाको निन्दा गर्दै आज कालोपट्टी बाँधेर विरोध जनाएका हुन् । 

जिल्ला प्रशासन कार्यालय बैतडीलाई ज्ञापनपत्र बुझाउँदै उनीहरुले स्वास्थ्य संस्थाजस्तो संवेदनशील क्षेत्रमा यस्ता किसिमका गतिविधि जोसुकैलाई पर्न सक्ने भन्दै अस्पतालमा कार्यरत चिकित्सक, स्वास्थ्यकर्मी तथा कर्मचारीहरुलाई सुरक्षाको प्रत्याभूति नभएसम्म बिरामीको जाँच गर्न नसक्ने बताएका छन् । 

साथै, भोलिदेखि आकस्मिकबाहेकका सम्पूर्ण सेवा बन्द गर्ने उनीहरुको तयारी छ । ‘अस्पतालमा कार्यरत चिकित्सक, स्वास्थ्यकर्मी तथा कर्मचारीहरुलाई सुरक्षाको प्रत्याभूति नभएकाले दोषीलाई कारबाही नभएसम्मको लागि मानसिक रुपले विक्षप्त अवस्थामा हामी बिरामी हेर्न असमर्थ रहेको जानकारी गराउँछौं,’ ज्ञापनपत्रमा भनिएको छ ।