परिक्षालाई मर्यादित बनाउने जिम्मेवारी बोकेर रुकुमबाट कालिकोट पुगेका एक शिक्षक परिक्षामा अनियमित गरेको आरोपमा कारबाहिको फन्दामा पर्ने देखिएका छन् ।
रुकुम पश्चिमको चौरजहारी नगरपालिका वडा नम्वर ११ मा रहेको हिमालय माध्यमिक बिद्यालय खोलागाउँका सहायक प्रशिक्षक लोकेन्द्र मल्ल माथि परिक्षामा अनियमित गरेको आरोप लागेको हो । उहाँलाई यहि आरोपमा कुरा बुझ्न भन्दै प्राविधिक शिक्षा तथा व्यवसायिक तालिम परिषद कर्णाली प्रदेश कार्यालयले पत्र काटेको छ । आईतबार तयार पारिएको पत्रमा मल्ललाई तीन दिनभित्र कार्यालयमा उपस्थित भई यथार्थ कुरा बताउन अल्टिमेटम दिईएको छ । कर्णाली प्रदेश कार्यालयका प्राविधिक अधिकृत प्रेम प्रसाद बाँस्कोटाका अनुसार मल्लमाथि परिक्षामा अनियमति गरेको जानकारी प्राप्त भएको छ ।
मल्ललाई गत भदौ २२ गतेदेखि असोज १ गतेसम्म कालिकोटको रास्कोट नगरपालिकाको वडा नम्वर ८ स्थित जनजागृति माविमा बाह्य सुपरिवेक्षकको रुपमा खटाईएको थियो । प्रि डिप्लोमा तहको अन्तिम परिक्षा सञ्चालनका लागि बाह्य सुपरिवेक्षक बनाईएका मल्लले त्यहाँ पुगेर बिद्यार्थीहरुबाट परिक्षामा पास बनाईदिने भनेर रकम असुलेको आरोप छ ।
कृषि प्राविधिक पढ्ने विद्यार्थीहरुको परिक्षामा विद्यार्थीलाई पास गराईने प्रलोभनमा सुपरिवेक्षकबाटै पैसा असुली गरिएको जानकारी पश्चात परिषद् कारबाहिको तयारीमा लागेको हो । परिक्षा केन्द्रमा सिटिईभिटी कार्यालयबाटै सुपेरिवेक्षणका लागि खटिएका सुपरिवेक्षक मल्लले प्रति बिद्यार्थी एक हजारको दरले रकम असुल गरेको बताईन्छ ।
परिक्षामा बडिमालिका माध्यमिक विद्यालय रास्कोटबाट १७ जना, ज्ञानोदय माध्यमिक विद्यालय राम्नाकोटबाट ४ जना र जनप्रभात माध्यमिक विद्यालय लालुबाट १९ जना गरी ४० जना विद्याथी सहभागी भएका थिए ।
उनीहरु सिटिभिईटी अन्तरगत कोही कृषि बालीविज्ञान र कोही भेटेरेनरी जेटियो पढने विद्यार्थीहरु हुन । सुपरिवेक्षक मल्लले प्रत्येक परिक्षार्थीहरुबाट एक हजारका दरले रुपैया उठाएर दिए परिक्षामा चिट चोराएर भएपनि पास गराई दिने प्रलोभन दिएको विद्यालय व्यवस्थापन समिति श्रोतले जनाएको छ ।
भनेको रकम नदिएका ६ जना विद्यार्थीहरुलाई सुपेरिवेक्षक मल्लले फेल गराईने धम्की दिन थालेपछि घटनाको रहस्य विद्यार्थीबाटै सार्वजनिक भएको थियो । घटनापछि ईलाका प्रहरी कार्यालय रास्कोटमा छलफल भएको र सुपेरिवेक्षक मल्लले १६ हजार रुपैया फिर्ता गरेको बताईन्छ । बाँकि रकम असोज १० गते भित्र फिर्ता गर्ने प्रतिबद्धता गरेतापनि फिर्ता नगरेको बताईन्छ ।
