नेकपा एकीकृत समाजवादी पार्टीले थालेको ‘समाजवादी जागरण अभियान, २०८०’ रौतहट आइपुगेको छ । गत असोज १४ गतेदेखि थालिएको अभियान झापा,मोरङ,सुनसरी, सप्तरी,सिरहा,धनुषा, महोत्तरी,सर्लाही हुँदै रौतहटको गौर आइपुगेको हो ।
पार्टीका उपमहासचिव एवं प्रवक्ता जगन्नाथ खतिवडाले आज बाराको सिमरा र निजगढमा पनि सम्मेलन गरिने बताए । हरेक जिल्लामा भएको सभामा जनमानसको विशाल उपस्थिति देखिएको उनको भनाइ छ ।
उनका अनुसार सभामा एक लाखभन्दा बढी जनसहभागी हुन सक्ने देखिएको छ । मुलुकको समसामयिक विषयलाई उठाइएकाले सोचेभन्दा धेरैले उपस्थिति जनाएको प्रवक्ता खतिवडाको जिकिर छ ।
‘रोजगारी,सुशासन र समृद्धिलाई मूल नारा बनाएकाले धेरै जनसहभागिता देखिएको छ । अहिलेसम्म सबै ठाउँमा भव्य रुपमा सभा सम्पन्न भएको छ । अब अरु ठाउँमा पनि त्यही अपेक्षा राखेका छौं । मेचीदेखि महाकालीसम्म थालिएको अभियान असोज २९ गते सुर्खेत पुगेर टुंग्याउँछौं’, उनले भने ।
उक्त अभियानले पार्टी सुदृढीकरण गर्न निकै सहयोग पुर्याउने उनले बताए । कृषिमा सुधार, कृषिको बजारीकरण, कृषि उत्पादनलाई अनिवार्य सरकारले खरिद गर्नुपर्नेलगायतका विषयलाई मुख्य एजेण्डा बनाइएकाले किसानहरु पनि आकर्षित भएको उनको भनाइ छ ।
सप्तरीको राजविराज, छिन्नमस्ता,अर्नाहा र चन्हीमा गरिएको सभामा पूर्वप्रधानमन्त्री एवं पार्टी अध्यक्ष माधवकुमार नेपाल, वरिष्ठ नेता झलनाथ खनाललगायतका नेताले गरेको सम्बोधनले पार्टीको लोकप्रियता झनै बढेको उनले बताए ।
सभामा सात सय बढीले आफू जोडिएको पार्टी परित्याग गरी एकीकृत समाजवादीमा प्रवेश गरेका छन् । यसले नयाँ तरङ्ग सिर्जना गरेको समाजवादीका नेताहरुले बताएका छन् । हालसम्म भएको १८ वटा सभामा दुई हजार आठ सय जनाले पार्टी प्रवेश गरेको जनाइएको छ । एकीकृत समाजवादीले १० हजार बढीले पार्टी प्रवेश गर्ने अनुमान लगाएको छ ।
