पक्राउ परेकालाई छाडेपछि धनकुटामा सडक यातायात सुचारु
आफ्ना कार्यकर्ता रिहाइको माग गर्दै कोशी प्रदेश पुनःनामाङ्कन संघर्ष समितिले बिहानदेखि बन्द गरेको धनकुटाका सडक सुचारु भएको छ ।
जिल्ला प्रशासन कार्यालय धनकुटाकी सूचना अधिकारी ममता अधिकारीका अनुसार पक्राउ परेका पहिचान पक्षधर तीनै जना कार्यकर्तालाई छाडेपछि बिहानदेखिको बन्द खुलेको हो ।
‘अहिले धनकुटा खुलिसकेको छ । पक्राउ परेका तीनै जना बिनासर्त रिहा भएका छन्,’ उनले भनिन् । आफ्ना कार्यकर्ता बिनासर्त रिहाको माग राख्दै समितिले बिहानैदेखि कोशी राजमार्गमा यातायात अवरुद्ध गरेपछि यात्रुहरु बिचल्लीमा परेका थिए ।
सवारीसाधन अवरुद्धका कारण पहाडी जिल्लाहरु तेह्रथुम, संखुवासभा, भोजपुर, पाँचथरतर्फ जाने र त्यताबाट धनुकटा आउँदै गरेका सवारीसाधन सडकमा रोकिएका थिए ।
टिप्पणीहरू