धुलो घरमा छिरेको निहुँमा दलित महिलामाथि निर्घात कुटपिट, प्रहरीले बेवास्ता गरेको आरोप

दलित समुदायमाथिको ज्यादती अहिले पनि रोकिएको छैन् । सामान्य विषयलाई पनि बढाईचढाई गरेर कथित उपल्लो जातीबाट उनीहरु कुटपिटमा पर्ने गरेको घटना बारम्बार सार्वजनिक भैरहन्छ । 

यसैबीच नवलपरासी (बर्दघाट सुस्ता पूर्व) को सुस्ता गाउँपालिका वडा नम्बर ४, गोकुलपुरका चमार समुदायका महिलालाई यादव समुदायले निर्घात कुटेका छन् । दलितको घरको धुँलो आफ्नो घरमा छिरेको भन्दै कुटपिट गरिएको हो । 

घटना गत कात्तिक १० गतेको हो । ती महिलाहरु आफ्नो घरमा धान बत्याउँदै थिए । सोही क्रममा यादव समुदायका नौ जनाले आएर उनीहरुलाई गालीगलौज गर्न थालेका हुन् । धानको धुँलो आफूहरुको घरमा गएको भन्दै उनीहरुले कुटपिट गरे । 

जोगिन्दर यादव, भगन यादव, राजन यादव, घनश्याम यादव, विमला यादव, गुड्डी यादव, गीता यादवले जातीय गाली गर्दै गम्भीर घाइते हुनेगरी पिटेको पीडितका भाइ सन्दिप हरिजनले बताए । ‘घरमा कुनै पुरुष थिएनन् । सोही मौका पारेर उनीहरुले तल्लो जात, पानी नचल्ने जात, तिमीहरुको हैसियत केही छैन् भनि पिटेका हुन् । हामी आउँदा दिदीहरु शिथिल अवस्थामा थिए’, उनले भने । 

घाइते हुनेमा पुनम हरिजन, शिला हरिजन र सबिता हरिजन रहेका छन् । हाल उनीहरुको रुपन्देहीस्थित भैरहवा मेडिकल कलेजमा उपचार भइरहेको छ । पीडितहरुमाथि त्यसअघि पनि कुटपिट भएको बताइएको छ । प्रहरी प्रशासनको वेवास्ताले गर्दा पटक-पटक पिटाई खानुपरेको पीडितहरुको भनाई छ । 

यता, चमार कल्याण समाजले दोषीलाई कडाभन्दा कडा कारबाही गर्न माग गरेको छ । समाजद्धारा जारी विज्ञप्तिमा भनिएको छ,‘एक गरिब समुदायमाथि अत्याचार गरिनु, घरमा कोही नभएको मौका छोपी हत्या गर्ने प्रयास गर्नु गैर मानवता, क्रुर अपराधको कार्य भएको चमार कल्याण समाजको ठहर रहेको छ । कुटपिटमा संलग्नहरुलाई प्रहरी प्रशासनले जातीय विभेद, ज्यान मार्ने उद्योग, घरमा कोही नभएको मौका छोपी यसरी कुटपिट गर्नेलाई कारबाही गर्न हामी सारा चमार समाज माग गर्दछौं ।’

तर, वडा नम्बर ४ का वडाध्यक्ष निलबहादुर गुरुङ्गले भने विवाद त्यति ठूलो नभएको बताए । सामान्य कुरामा विवाद हुँदा स्थिति हातपातसम्म पुगेको उनको भनाई छ । पीडित परिवारले मिलापत्र गर्न नमानेकाले ईलाका प्रहरी कार्यालय, बेलाटारीले मुद्दा दर्ताको प्रक्रिया अघि बढाएको उनले जानकारी दिए । 

‘कुरा त्यति ठूलो होइन् । सामान्य विषयमा विवाद बढ्दै जाँदा कुटपिट भएको हो । दुवै पक्षबीच चौकीमा छलफल भएको थियो । पीडितहरुले मिलापत्र पनि गर्न मान्नुभएन्, उपचार खर्च पनि लिनुभएन् । मुद्दा दर्ताको प्रक्रिया अघि बढेको छ’, उनले भने । 

त्यस्तै, ईलाका प्रहरी कार्यालय, बेलाटारीले दुई जनालाई नियन्त्रणमा लिएको जानकारी दिएको छ । प्रहरी हिरासतमा रहेका जोगिन्दर यादव र भगन यादवविरुद्ध मुद्दा दर्ताको प्रक्रिया अघि बढेको कार्यालयले जनाएको छ ।