तीन दलका कारण गणतन्त्र खतरामा परेको रवि लामिछानेको आरोप

राष्ट्रिय स्वतन्त्र पार्टी (रास्वपा)का सभापति रवि लामिछानेले पुराना दलहरुकै कारण व्यवस्था खतरामा परेको दावी गरेका छन् । 

कांग्रेस, एमाले र माओवादी केन्द्रका गतिविधिले नै विद्यमान राजनीतिक व्यवस्था खतरामा परेको आरोप लगाएका उनले अरुलाई दोष नदिन चेतावनी दिए । आज बसेको प्रतिनिधिसभा बैठकमा लामिछानेले भने, ‘व्यवस्था नै खतरामा पर्‍यो भनेर भनेको सुनियो । तपाईंहरूकै कारण यो व्यवस्थामा खतरा आउने त होइन ?’

उनले माओवादी केन्द्रले काठमाडौँमा गर्न लागेको जनप्रदर्शनप्रति पनि कटाक्ष गरे । ‘व्यवस्था बचाउन प्रधानमन्त्रीले नेतृत्व गरेको दल नै सडकमा आउने हो कि ?’ लामिछानेले व्यंग गर्दै भने । प्रमुख तीन दलबाहेक अरुप्रति संसद अनुदार बनेको पनि उनले आरोप लगाए । 

पछिल्लो समय राजावादीहरुको बढ्दो सक्रियता र जनताको असन्तुष्टिमा खेल्ने नयाँ पार्टीहरुका कारण गणतन्त्रमाथि खतरा उत्पन्न भएको तीन ठूला दलको आरोप छ ।