काठमाडौंमा सीप सिकाउन चाहनेहरु सूचीकृत हुनैपर्ने

काठमाडौं महानगरपालिकाले ‘पुस्तकविहीन शुक्रबार, शिक्षामा सीप कार्यक्रम’ मा प्रशिक्षण दिन चाहने संघसंस्था तथा व्यक्तिलाई विद्यालयमा सूचीकृत हुन आह्वान गरेको छ । महानगरपालिकाले कक्षा ९ र १० मा अध्ययनरत विद्यार्थीलाई सीप सिकाउन चाहने संघसंस्था तथा व्यक्तिलाई सूचीकृत हुन आग्रह गरेको छ । 

चालु शैक्षिक सत्रदेखि महानगरपालिकाले सामुदायिक विद्यालयहरुमा पुस्तकविहीन शुक्रबार कार्यक्रम सञ्चालन गरेको छ । पाठ्यपुस्तकबाट प्राप्त हुने सैद्धान्तिक ज्ञानसँगै जीवनोपयोगी, सीपमूलक तथा व्यवहारिक शिक्षा प्रदान गर्न महानगरपालिकाले यो कार्यक्रम थालेको हो । 

९० घण्टाको तालिमको निम्ति १० वटा विषय समावेश छ । कृषि तथा शहरी खेती, सौन्दर्य र हेयर स्टायल, काष्ठकला तथा नक्कासी, पाककला, फेसन डिजाइन र कपडा निर्माण, वायरिङ्ग एण्ड इलेक्ट्रिकललगायत विषय राखिएको छ ।

यी विषयमा तालिम कक्षा सञ्चालन गर्न सक्ने संस्था वा व्यक्ति सूचीकृत हुन सक्छन् । सेवा प्रदायक संस्थाको अनुभव, जनशक्तिको योग्यता, प्रशिक्षकको प्रशिक्षण तालिम, प्रविधि हस्तान्तरणसम्बन्धी प्रतिबद्धता, आर्थिक तथा प्राविधिक क्षमतालगायतका विषयलाई मूल्याङ्कन गरेर प्रशिक्षक छनौट गरिने महानगरपालिकाले स्पष्ट पारेको छ । 

महानगरपालिकाभित्र रहेका ८९ मध्ये ५७ विद्यालयमा यो कार्यक्रम सञ्चालनमा छ ।