रिगल फेरि पक्राउ, साढे ११ वर्ष जेल बस्नुपर्ने

यसअघिको कैद मिनाहा गर्ने राष्ट्रपतिको निर्णय सर्वोच्च अदालतले बदर गरेसँगै रिगल भनेर चिनिने योगराज ढकाल भर्खरै पक्राउ परेका छन् । 

जिल्ला प्रहरी कार्यालय, बाँकेको टोलीले उनलाई नेपालगञ्जबाट सर्वोच्चको आदेशलगत्तै नियन्त्रणमा लिएको हो । उनलाई कैद सजाय मिनाहा गर्ने निर्णय उत्प्रेषणको आदेशले बदर गर्दै पुनः कारागार पठाउन सर्वोच्चले परमादेशसमेत जारी गरेको छ । 

यो आदेशसँगै रिगललाई पुनः बाँकी कैद भुक्तानका लागि कारागार पठाइने छ । जिल्ला अदालत बाँके र उच्च अदालत तुलसीपुरले जन्मकैदको फैसला सुनाएकाले उनी २० वर्ष जेल बस्नुपर्ने हुन्छ । 

तर, ११ वर्ष ११ महिना ५ दिन कैद भुक्तान गर्न बाँकी हुँदै संविधान दिवसको अवसरमा उनलाई रिहा गरिएको थियो । त्यसविरुद्ध चेतनकी श्रीमती भारती शेर्पाले अदालतमा रिट हालेकी थिइन् ।