जीवाश्म इन्धनको प्रयोग अन्त्य गर्ने विश्वव्यापी आह्वानमा एनएमबी सामेल

एनएमबी बैंकले ग्लोबल एलायन्स फर बैंकिङ भ्यालुज (जीएबीभी) का १७ अग्रणी बैंकको समूहसँग जीवाश्म इन्धनको प्रयोग अन्त्य गर्न हातेमालो गरेको छ । 

‘फोसिल फ्रयुल नन प्रोलिफिकसेन ट्रिटी’ अनुमोदन गरेसँगै बैंक जीवाश्म इन्धनको अन्त्यको विश्वव्यापी अभियानमा एकाकार भएको हो । 

यो सन्धि हरित ऊर्जाको व्यवस्था, जीवाश्म इन्धनको वितस्तारको अन्त्य र वर्तमानको उत्पादनलाई निर्मुल पारी अन्तर्राष्ट्रिय हातेमालो गरेर पेरिस सम्झौताका लक्ष्यहरु हासिल गर्ने विश्वव्यापी प्रयास मानिन्छ । यो सन्धिप्रति प्रतिबद्धता जाहेर गर्ने वित्तिय संस्थाहरुको संख्या बढ्दो छ । 

योसँगै जलवायु संकटको मूल कारण तेल, ग्याँस र कोइरालाको उत्पादन तथा प्रयोगलाई सम्बोधन गर्न विश्वव्यापी प्रयासमा महत्त्वपूर्ण कदम अघि बढेको छ । यो कदमले उज्यालो, स्वच्छ भविष्यको प्रतिज्ञा गर्नुका साथै वातावरणीय कल्यणा र दीर्घकालीन दिगोपनलाई प्राथमिकता दिने एनएमबी बैंकको भनाइ छ । 

बैंकका प्रमुख कार्यकारी अधिकृत (सीईओ) सुनिल केसीले भने, ‘यसले जलवायु कार्यलाई अघि बढाउन र पेरिस सम्झौताका लक्ष्यहरुसँग पङ्क्तिबद्ध गर्ने, कार्बन उत्सर्जन प्रकटीकरण र व्यवस्थापनमा हाम्रा प्रयासलाई बढावा दिने प्रतिबद्धतालाई दर्साएको छ । हामी सचेत छौं कि जलवायु परिवर्तन हाम्रो समयको सबैभन्दा महत्त्वपूर्ण मुद्दामध्ये एक हो । र, हामी समाधानको हिस्सा बन्न प्रतिबद्ध छौं ।’

जीवाश्म इन्धनको निर्भरतामा कमी आउनुले स्वच्छ हावा, पानी, जमिन र मानवीय स्वास्थ्य र जीवनको गुणस्तरलाई प्रत्यक्ष रुपमा फाइदा पुग्ने बैंकले जनाएको छ । यसले हरित अर्थतन्त्रमा आर्थिक वृद्धि र स्थिरतालाई प्रोत्साहन गर्दै दिगो विकासको ढाँचा प्रदान गर्ने बैंकको विश्वास छ ।