यौनकाण्डमा एमाले नेताविरुध्द अदालतबाट पुर्जी जारी

यौनकाण्ड,उठ्तीपुठती लगायत अनेक विवादमा मुछिंदै आएका एमाले नेता तथा पूर्व अखिल अध्यक्ष ऐन महरको नाममा अदालतले १५ दिने म्याद सूचना जारी गरेको छ । 

रश्मिलाकुमारी धामीले दायर गरेको मुद्दामा उच्च अदालत पाटनले जेठ ३२ गते म्याद जारी गरेको हो । असार ३ गते गोरखापत्रमा सूचना प्रकाशित गर्दै अदालतले महरलाई आफैँ उपस्थित हुन वा वारेसमार्फत लिखित जवाफ पेश गर्न भनेको छ । अन्यथा कानुनबमोजिम हुने अदालतले स्पष्ट पारेको छ ।

अदालतले जेठ ९ गते प्रतिवादीको नाममा म्याद सूचना पठाएको थियो । तर, म्याद तामेल हुन नसकेपछि दोस्रो पटक पत्रिकामा सूचना प्रकाशित गरेको हो । 

बझाङवासी पूर्वअखिल अध्यक्ष महर र अखिलकै कार्यकर्ता रहेकी रश्मिलाबीच लामो समयदेखि विवाद छ । आफूमाथि यौन दुर्व्यवहार गरेको जनाउँदै शुरुमा रश्मिला जाहेरी लिएर प्रहरीमा पुगेकी थिइन् । तर, सत्ता र शक्तिको पहुँचमा रहेका महरविरुद्धको जाहेरी प्रहरीले दर्ता गर्न नमानेपछि उनी उच्च अदालत पुगेकी हुन् । 

उत्प्रेषणसमेतको आदेश माग्दै दर्ता भएको मुद्दा इजलासमा पेश गरी अदालतले जेठ ९ गते प्रतिवादीको नाममा म्याद सूचना पठाएको थियो । तर, म्याद तामेल हुन नसकेपछि दोस्रो पटक पत्रिकामा सूचना प्रकाशित गरेको हो ।