जीप दुर्घटनामा चालकसहित पाँचको मृत्यु, दुई घाइते

जाजरकोटमा गएराति भएको जीप दुर्घटनामा पाँच जनाको ज्यान गएको छ । दुर्घटनामा दुई जना घाइते भएको बताइएको छ । 

नलगाड नगरपालिका–३ को बिराखोला कैना–कट्के सडकबाट जीप सात सय मीटर तल खसेको छ । घाइते सात जनालाई उद्धार अस्पताल पुर्याए पनि पाँचको निधन भएको हो ।

जिल्ला प्रहरी कार्यालय जाजरकोटका अनुसार ३१ वर्षीय चालक इन्द्रजित थापा, ६४ वर्षीया शिला पुन, ३२ वर्षीया शारदा थापा, १७ वर्षीया लक्ष्मी पुन रोका र एक महिनाको शिशुको मृत्यु भएको छ । शिशुको आमा मृतक लक्ष्मी पुन हुन् ।