बजेटको निष्पक्षता जाँच्न संसदीय समिति गठनको माग

सत्तारुढ नेपाली काँग्रेसका सांसद अर्जुननरसिंह केसीले अगामी आर्थिक वर्षको बजेट विनियोजनमा मनोमानी भएको भन्दै छानविनको माग गरेका छन् ।

प्रतिनिधि सभाको आजको बैठकमा विनियोजन विधेयकमाथिको छलफलमा भाग लिँदै उनले विनियोजन प्रक्रिया ठीक छ कि छैन भनेर संसदीय छानविन समिति गठन गर्न माग गरेका हुन् । बजेट विनियोजन ठिक भए-नभएको अध्ययन गर्न संसदीय समिति बनाउनुपर्ने नभए सुशासन समिति वा सार्वजनिक लेखा समितिमा पठाउनुपर्नेमा सांसद केसीले जोड दिए । 

‘दुई वटा उपप्रधानमन्त्रीसँग मेरो विनम्रतापूर्वक आग्रह छ तपाईले बजेटमा प्रस्तुत गर्नुभएअनुसार विनियोजन ठिक छ कि छैन भनेर एउटा संसदीय समिति बनाऔँ । त्यसले छानविन गरोस्', उनले भने, ‘यदि संसदीय समिति हुन्न भने सुशासन समिति वा लेखा समितिमा पठाइयोस् । यो मनपरी ढंगले जसरी विनियोजन गर्ने काम भएको छ त्यो दु:खद् मात्र होइन खेदपूर्ण हो सम्माननीय सभामुख महोदय ।'

सांसद केसीले बजेट वितरणमा समान व्यवहार नभएको उल्लेख गर्दै मन्त्री र शीर्ष नेताहरूको जिल्लामा परेको बजेट र अन्य जिल्लाको बजेटबीच तुलना गरेर हेर्नुपर्ने बताए ।  

‘मेरो गुनासो के हो भने तद्अनुरुप समान व्यवहार भयो कि भएन ? नयाँदेखि पुराना सबै माननीयहरुलाई बजेटले सन्तुलित गर्ने काम गर्यो कि गरेन ?’, केसीले प्रश्न गरे, ‘मन्त्रीज्युहरु र शीर्षस्थ नेताहरुको जिल्लामा राखिएको बजेट र पूरै देशको बजेट एक ठाउँमा राखेर तुलना गरौँ के स्थिति हुन्छ ? यसमा छानविन गर्नुपर्छ ।’

उनले बजेटको सिद्धान्तअनुसार विनियोजन नभएको भन्दै आपत्ति जनाए ।