श्रीमतीको ठाउँमा बाबुलाई ल्याउने तयारी, बानेश्वरमा भेला जारी

नागरिक उन्मुक्ति पार्टी (नाउपा) को प्रथम राष्ट्रिय भेलाको दोस्रो दिन निकै ढिलोगरी बन्दसत्र शुरु भएको छ । संरक्षक रेशमलाल चौधरीले बिलम्ब गरेपछि ११ बजेका लागि तय भएको भेला दिउँसो साढे १ बजेबाट शुरु भएको हो । 

काठमाडौँको मध्य बानेश्वरस्थित सनराइज क्याफेको हलमा अहिले भेला जारी छ । राष्ट्रिय भेला समितिका संयोजक रामलाल डंगौरा थारुको अध्यक्षतामा चलिरहेको भेलामा रेशमलाल, नेता अरुण कुमार चौधरी, महासचिव गंगा चौधरी, सांसद लालवीर चौधरीलगायतको उपस्थिति छ । 

भेलाको पहिलो दिन हिजो अध्यक्ष तथा रेशमपत्नी रञ्जिता श्रेष्ठ चौधरीलाई पार्टीबाट निकाल्ने निर्णय भएको थियो । आज त्यसलाई अनुमोदन गर्दै नयाँ अध्यक्ष चयन गरिने सम्भवना रहेको सो पार्टीका एक नेताले जनाकारी दिएका छन् । 

श्रीमान-श्रीमतीको घर झगडाको कारण किचलोमा फस्दै आएको नाउपामा पछिल्लो पटक अध्यक्ष रञ्जिता घुस काण्डमा मुछिएपछि लफडा बल्झिएको हो । आफू विवादमा परेपछि उनले राप्रपाबाट हालै प्रवेश गरेका शिव बाँस्तोलालाई कार्यवाहक तोकेकी  थिइन् । 

उक्त निर्णय विधिसम्मत नरहेको भन्दै पार्टीको अनुशासन समितिले अध्यक्षलाई निष्कासित गर्ने निर्णय गरेको थियो । त्यसपछि रेशमले बहुमत केन्द्रीय सदस्यको आडमा राष्ट्रिय भेला बोलाएका हुन् ।

अध्यक्षलाई बर्खास्त गर्ने हिजोको निर्णय आज अनुमोदन गर्ने र सोको जानकारी निर्वाचन आयोगलाई गराउने नाउपाको तयारी छ । आजै लालवीर चौधरीलाई अध्यक्ष तोक्ने सम्भावना छ भनिन्छ । उनी रेशमका बाबु हुन् ।