सौर्य जहाज दुर्घटनाको प्रतिवेदन मृतकका आफन्तलाई अमान्य

सौर्य एयरलाइन्सको नाइनएन—एमइ सिआरजे २०० विमान दुर्घटनामा तीन सन्तान गुमाएका प्रकाश खतिवडाले जाँचबुझ आयोगको प्रतिवेदनमाथि असन्तुष्टि जनाएका छन् । 

प्रतिवेदनले कतिपय कुरा सहीरुपमा बाहिर ल्याउन नसकेको दाबी गर्दै उनले आज प्रतिनिधि सभाअन्तर्गतको अन्तर्राष्ट्रिय सम्बन्ध र पर्यटन समितिको बैठकमा असहमति व्यक्त गरेका हुन् । नेपालमा हालसम्मको १०९ वटा विमान दुर्घटनाको इतिहास हेर्दा सौर्य जहाजको दुर्घटना छुट्टै खालको भएको खतिवडाले बताए । 

मानवीय त्रुटिका कारण विमान दुर्घटना भएको निष्कर्ष देखाइएकोमा भने उनके सहमति जनाएका छन् । तर, सौर्य एयरलाइन्स, एरोड्रोन र नेविगेसनको विषय प्रतिवेदनमा गरिए पनि सेवा प्रदायक भनेर उल्लेख नगरेकोप्रति आपत्ति जनाए । 

सेवा प्रदायक संस्थाको अनुमति दिने व्यक्ति जाँचबुझ समितिका संयोजक रतिशचन्द्रलाल सुमनको आफन्त भएकाले त्यो नखुलाइएको खतिवडाको दाबी छ । सौर्यको त्यसदिनको उडान, यात्रुहरु र एयरलाइन्स कम्पनीको हर्कत पनि अवैधानिक रहेको उनले खुलाए । 

उर्जा मन्त्रालयमा कार्यरत आफ्नी छोरी र चार वर्षको नातीलाई समेत सौर्य एयरलाइन्सको कर्मचारी बनाएर उडाइएको भन्दै उनले दुखेसो पोखे । सरकारले छानविनका लागि बनाएको जाँचबुझ आयोग अवैधानिक रहेको खतिवडाको भनाइ छ ।

‘मेरो ४ वर्षको नातीलाई किन सौर्य एयरलाइन्सको स्टाफ बनाइयो ? यहाँ हेर्न सक्नुहुन्छ । म देखाउनसक्छु । अधिराज शर्मा, सौर्य एयरलाइन्स स्टाफ । मेरी छोरी उर्जा मन्त्रालयमा कार्यरत थिइन् । तर सौर्य एयरलाइन्सको स्टाफ लेखिएको छ’, उनले गुनासो गर्दै भने, ‘घटनाको दिनसम्म उर्जा मन्त्रालयमा कार्यरत थिइन् । आर्थिक र व्यापारिक स्वार्थसँग जोडेर मेरो डिग्निटीसँग खेल्ने प्रयास भयो । मेरो छोरीलाई भ्रष्टीकरण गर्ने प्रयास भएको छ । उर्जा मन्त्रालयमा कार्यरत थिइन् मेरी छोरी । कसरी सौर्य एयरलाइन्सको स्टाफ भइन् ?’

प्रतिवेदन बनाउँदा अरुसँग अन्तर्वार्ता लिएको उल्लेख गरेपनि तीन सन्तति गुमाएको परिवारसँग कुनै सोधपुछ नगरिएको उनको भनाइ छ । त्यसकारण प्रतिवेदन नियोजित रहेको ठहर गर्दै उनले पीडितका कुरा सुनियो भनेपनि न्याय पाएको अनुभुति नभएको स्पष्ट पारे । 

‘आयोग पनि इलिगल छ । यो प्रतिवेदन नियोजित छ । सारासँग अन्तर्वार्ता लिएको छ । तर म तीन सन्तान गुमाएको अभिभावकसँग उहाँले सम्पर्क पनि गर्न चाहनुभएन । मेरो पीडा त्यहाँबाट शुरु भएको छ । पीडितलाई पीडितका कुरा सुनियो भनेपनि न्याय पाएको अनुभुति हुन्छ’, खतिवडाले भने, ‘तपाईंहरुले आज राम्रोसँग कुरा सुनिदिनुभयो भने मलाई न्याय चाहिँदैन । मेरो पीडा कम हुन्छ । तर उहाँहरुले मसँग सम्पर्क गर्न चाहनुभएन । मलाई मान्छे ठान्नुभएन । सबैभज्दा बढी क्षति व्यहोरेको मान्छे हुँ ।’

उनले न्यायिक जाँच आयोग बनाएर थप अनुसन्धान गर्न मागसमेत गरेका छन् । तथ्य र प्रमाणले सार्यको विमान दुर्घटनामात्रै नभएको स्पष्ट हुने जिकिर उनले गरे । 

२०८१ को साउन ९ गते त्रिभूवन अन्तर्राष्ट्रिय विमानस्थलमा सौर्य एयरलाइन्सको जहाज दुर्घटना भएको थियो । जहाँ १८ जनाको ज्यान गएको थियो । दुर्घटनामा खतिवडाका ज्वाईं, छोरी र नातीको निधन भएको थियो ।