गोकुल खरानी टक्टक्याउँदै चोटा कोठामा

२०७६ फागुन २८ गते नेत्रविक्रम चन्द ‘विप्लव’ समूहले बम पड्काएर छियाछिया बनाएको पूर्वमन्त्री तथा एमाले पोलिटब्युरो सदस्य गोकुल बाँस्कोटाको लोहकन्थलीस्थित साढे २ आनामा बनेको साढे दुई तले भवन भित्रैबाट पूर्ण रूपमा जलेर खरानी भएको छ ।

‘चौथो पटकको आक्रमणमा घर पूर्ण ध्वस्त बनाए, तर खरानी टक्टक्याउँदै पार्टी र विचारलाई अघि बढाउनेछु,’ भेट्न जानेहरूसँग बाँस्कोटा भन्छन्, ‘नियोजित रूपमा व्यक्तिका घर छानीछानी आक्रमण गर्ने जत्थाको पहिचान हुनु जरुरी छ । जेन–जीले उठाएका कतिपय माग जायज छन् ।’

बाँस्कोटाको घरमा पहिलो आक्रमण गर्ने र भीडलाई उक्साउने कलाकार अपूर्व क्षितिज रहेको बताइन्छ । त्यसक्रममा काभ्रेको भुम्लु घर भएका एक माओवादी नेता पनि संलग्न थिए । आगलागी हुनु आधा घण्टाअघि उनकी श्रीमती र सन्तान भागिसकेका थिए । बाँस्कोटा स्वयम् पनि उपचारका लागि बाहिरै थिए । घर जलेपछि उनी सपरिवार आफन्तकोमा शरण लिएर बसिरहेका छन् ।

प्रत्यक्षदर्शीका अनुसार घरअगाडि रहेको पार्कबाट अपूर्व क्षितिजले युवाहरुलाई जम्मा हुन आग्रह गर्दै लाइभ गरे । भीड जम्मा भएपछि “हान्दियो भनी” उकास्थे । केही युवा गएर ढुंगामुढा गर्थे । त्यसपछि “आँटेपछि सकिँदो रहेछ गाइज” भन्दै उचाल्थे । क्षणभरमै आगोको मुस्लो दन्कियो ।

बाँस्कोटाले छानीछानी घर हानेर ध्वस्त बनाए पनि विचारको जग हल्लिन नसक्ने दाबी गरेका छन् । पछिल्लो समय पूर्वराष्ट्रपति विद्यादेवी भण्डारीको पक्षमा खुलेका उनले “अब नेतृत्वले बिदा लिनुपर्छ” भन्ने अभिव्यक्ति दिएका छन् ।

मदन भण्डारीकै शैलीमा कोही नेता आउलान् वा नआउलान्, तर एमाले जनताबीच फर्किन्छ भन्ने उद्घोष उनले संविधान दिवसका अवसरमा बनेपाको चार दोबाटोमा गरेका थिए । ७० करोड रुपैयाँ घूसको अडियो सार्वजनिक भए पनि ०७९ को निर्वाचनमा जनताले उनलाई पुनः अनुमोदन गरेका थिए ।

पनौती नगर प्रमुख रामशरण भण्डारी, उपप्रमुख गीता बञ्जारा, वडाध्यक्ष पुरुषोत्तम अधिकारी, पूर्व नगर प्रमुख भीम न्यौपाने र उनका छोरा दीपक न्यौपाने, अन्नपूर्ण पोस्ट र सिम्रिक एयरका प्रमुख क्याप्टेन रामेश्वर थापा, पूर्वसांसद तथा कांग्रेस नेता शिवप्रसाद हुमागाईंलगायतका घरमा समेत तोडफोड, लुटपाट र आगजनी भएको छ । उता धुलिखेल नगर प्रमुख अशोक ब्याञ्जुको घरमा समेत आगजनीसहित लुटपाट भएको छ ।

त्यस्तै बनेपा नगरपालिका, इलाका प्रहरी कार्यालय र ट्राफिक प्रहरी कार्यालय जलाएर पूर्ण ध्वस्त बनाइएको छ । अन्य प्रहरी चौकी, नगरपालिका तथा वडा कार्यालयहरूमा पनि तोडफोड र लुटपाट भएको छ । कारागार कार्यालयभित्र समेत आगो लगाइएको छ ।

पनौती–३ कुशादेवीस्थित पूर्व नगर प्रमुख भीम न्यौपाने र उनका छोरा दीपक न्यौपानेको घरमा पनि आगजनी भयो । न्यौपानेको घर जाने बाटो पुल नजिकै केही समय स्थानीयले जत्थालाई रोक्ने प्रयास गरेका थिए । तर उनीहरूले हतियारसहित मिनीट्रकमा थप जत्था ल्याएपछि स्थानीय केही गर्न सकेनन् । त्यसपछि सो समूहले आक्रमण, तोडफोड र आगजनी सुरु गरेको थियो ।

उही समूह क्याप्टेन थापा, उपप्रमुख बञ्जारा र वडाध्यक्ष अधिकारीको घर जलाउन समेत सहभागी थियो । माओवादी नेता आशिष घोरसाइनेसहित उनीहरू नगर प्रमुख रामशरण भण्डारीको घर हान्न पुगेका थिए ।

रास्वपा नेता विवेक भट्टराई र सुदर्शन तिमिल्सिनाले शिव हुमागाईंको सम्पत्ति तोडफोड गरेका थिए । ती दुवै जनाले रास्वपाबाट राजीनामा दिइसकेका छन् । माओवादी, रास्वपा र केही कांग्रेससम्बद्ध व्यक्तिहरू खुलेआम घरमा तोडफोड र आगजनीमा सक्रिय भएका पुष्टि भएको छ ।

– मोतीराम तिमल्सिना