नेपाली कांग्रेसका नेता तथा निवर्तमान गृहमन्त्री रमेश लेखकले जेन-जी प्रदर्शनको क्रममा आफूले प्रहरीलाई गोली चलाउन आदेश नदिएको प्रष्टीकरण दिएका छन् ।
एक महिनापछि आज सार्वजनिक भएका उनले तत्कालीन प्रधानमन्त्री केपी शर्मा ओली र आफूले गोली हान्न आदेश नदिएको दावी गरेका हुन् । आइतबार काँग्रेसको केन्द्रीय समिति बैठक बस्दैछ । त्यसअघि बैठकको एजेण्डा तय गर्न छलफलका लागि सानेपास्थित केन्द्रीय कार्यालय पुगेका लेखकलाई सञ्चारकर्मीले घेरेर प्रश्न तेर्साएका थिए ।
सबैभन्दा पहिले लेखकले जेन-जी प्रदर्शनमा ‘प्रधानमन्त्री र गृहमन्त्रीले गोली चलाउन आदेश दिएको’ भन्ने भाष्य बनाइएकोमा आपत्ति जनाउँदै खण्डन गरे ।
‘अहिले प्रधानमन्त्री र गृहमन्त्रीले प्रहरीलाई गोली चलाउन आदेश दियो भनेर चर्चा गरिराख्या छन्, तर सत्य होइन’, लेखकले भने, ‘के जानकारी गराउन चाहन्छु भने प्रहरीलाई गोली चलाउन प्रधानमन्त्री र गृहमन्त्रीले आदेश दिने विषय नै हुँदैन, मिल्दैन, मैले कुनै त्यस्तो आदेश दिएको छैन, जहाँसम्म लाग्छ तत्कालीन प्रधानमन्त्रीज्यूबाट पनि त्यस्तो कुनै आदेश भएको छैन ।’
लेखकले जेन-जी प्रदर्शनमा घुसपैठ भएको दावी गर्दै स्वार्थ समूहहरुको परिचय विस्तारै खुल्दै जाने विश्वास व्यक्त गरे । गुप्तचरले तपाईलाई घुसपैठ हुनसक्ने कुनै सूचना दिएन ? भन्ने प्रश्नमा उनले भने, ‘मैले प्राप्त गरेका सूचनाहरु म केही दिनपछि भनुलाँ, तर अहिले के भन्न चाहन्छु भने जेनजी युवाहरुले असल माग राखेर आन्दोलन गरेका थिए, तर दुर्भाग्यवश घुसपैठ भयो, अत्यन्त दुखद र पीडादायी घटना भयो ।’
सुशीला कार्की नेतृत्वको सरकारले पक्राउ गर्न लागेको भन्ने प्रसंग औल्याउँदै लेखकले अहिलेको परिस्थितिमा सरकार, जाँचबुझ आयोग र राजनीतिक दलहरु पूर्वाग्रह र प्रतिशोधको भावनाभन्दा माथि उठेर जिम्मेवार बन्नुपर्ने बताए ।
प्रदर्शनको क्रममा ज्यान गुमाउनेहरुप्रति श्रद्धाञ्जली व्यक्त गर्दै उनले थपे, ‘अहिले देश निकै जटिल अवस्थामा छ, यस्तो अवस्थामा सरकार र आयोगले संविधान, लोकतन्त्र र जनताको भावनालाई सम्बोधन गर्नेगरी काम गर्नुपर्छ, प्रतिशोधको भावनाभन्दा माथि उठेर सोच्नुपर्छ, राजनीतिक दलहरु पनि संयम भएर अघि बढ्नुपर्छ ।’
