तीन चोर दसीसहित पक्राउ

चोरीमा संग्लग्न रहेको आरोपमा प्रहरीले मोरङ र सुनसरीबाट तीन जनालाई पक्राउ गरेको छ । पक्राउ पर्नेहरुमा बराहक्षेत्र–८ सुनसरीका २७ वर्षीय अटल राई, शिवसताक्षी नगरपालिका–९ का २१ वर्षीय रोहित भण्डारी र मेचीनगर नगरपालिका–६ का २७ वर्षीय दिलिप लिम्बु हुन् ।

राईलाई धरानकी टिनु बज्राचार्यको को.३१ प २४४ नम्बरको स्कुटर चोरी गरेको आरोप छ । उनलाई प्रहरीले चोरी भएको स्कुटरसहित बराहक्षेत्र–६ बाट पक्राउ गरेको हो । गत मंसिर ३ गते धरानबाट हराएको उक्त स्कुटर खोजतलास गर्ने क्रममा फागुन ८ गते स्कुटरसहित राई पक्राउ परेका हुन् ।

यसैगरी गत माघ १८ गते मोरङको सुन्दरहरैचा नगरपालिका–९ मा सूर्य कट्टेलले सञ्चालन गर्दै आएको किराना पसलमा चोरी गरेको अभियोगमा भण्डारी र लिम्बुलाई प्रहरीले पक्राउ गरेको हो । अभियुक्त दुवैले पसलबाट रिचार्ज कार्ड र अन्य सामानसहित १ लाख ५० हजार रुपैयाँ बराबरको चोरी गरेको आरोप लागेको छ ।

प्रहरीले चोरीमा संलग्न दुवैको खोजतलास गरी पक्राउ गरेको बताएको छ । उनीहरु दुवैको साथबाट ४९ हजार ८ सय रुपैयाँ बराबरको रिचार्ज कार्ड र नगद २५ हजार रुपैयाँ पनि बरामद गरिएको छ । दुवैविरुद्ध प्रहरीले थप अनुसन्धान गरिरहेको जनाएको छ ।