ब्राउनसुगर बोकेर हिँडेका युवक प्रहरी नियन्त्रणमा

नेपालगञ्जमा ब्राउन सुगरसहित एक युवकलाई प्रहरीले नियन्त्रणमा लिएको छ । उपमहानगरपालिका १६, चौलिकाचोक नजिकैबाट आज १ सय ५० ग्राम ब्राउनसुगरसहित उनलाई प्रहरीले नियन्त्रणमा लिएको हो ।

पक्राउ पर्नेमा बर्दिया बढैयाताल गाउँपालिका १ शान्तिपुरका २४ वर्षीय प्रविण बिसी रहेको बाँके प्रहरीले जनाएको छ । प्रहरीका अनुसार उनको हिँडाई शंकास्पद देखेपछि खानतलासी गर्दा ज्याकेटको खल्तीमा लुकाएको अवस्थामा उक्त लागुऔषध फेला परेको हो ।

उनको साथबाट प्रहरीले तीन हजार रुपैयाँ नगद पनि बरामद गरेको छ । उनी एक वर्षदेखि लागुऔषध सेवन तथा कारोबारमा संलग्न रहेको खुलेको प्रहरीको दाबी छ ।

बाँके प्रहरीका अनुसार सीमावर्ती रुपैडिया बजारबाट भारतीय नागरिकलाई चार लाख रुपैयाँ दिएर उनले ब्राउनसुगर रुपैडियामा खरिद गरेर काठमाडौं पठाउने कार्य गर्दै आएका थिए ।