‘अप्रेशन माइक चार्ली’ मा प्रहरीलाई सफलता

चितवन प्रहरीले सञ्चालनमा ल्याएको अप्रेशन माइक चार्लीमा सफलता हात पारेको छ । किर्ते सवारी दर्ता किताब तयार गरेर मोटरसाइकल बिक्री वितरण गरेको भन्ने सूचनाका आधारमा सञ्चालनमा ल्याएको अप्रेशनबाट प्रहरीले सफतला हात पारेको हो ।

अप्रेशनअन्तर्गत प्रहरीले छ वटा मोटरसाइकलसहित आठ जनालाई पक्राउ गरेको छ । पक्राउ पर्नेमा किर्ते सवारी दर्ता किताब तयार गरेर चोरीका मोटरसाइकलहरु प्रयोग गर्ने हुन् । उनीहरुलाई जिल्ला प्रहरी कार्यालय चितवनबाट खटिएको टोलीले विभिन्न कम्पनीका छ वटा मोटरसाइकलसहित पक्राउ गरेको हो ।

पहिले पनि पक्राउ परेका उनीहरुमध्ये दुई जना अदालतमा पेश गर्ने क्रममा भागेका थिए । उक्त चोरी मुद्दामा संलग्न भई फरार सर्लाहीको हरिवन १ का ३२ वर्षीय सुमित साह तथा सुवास भनिने इनरजोस साहलाई आज भरतपुर महानगरपालिका १० रिजाल चोकबाट पक्राउ गरी चितवन जिल्ला अदालतमा पेस गरिएको प्रहरीले जनाएको छ ।