नेपालगञ्जमा बन्दुक पड्काउदै हिँडेका तीन जना समातिए

प्रहरीले बाँकेमा विभिन्न हातहतियारसहित तीन जनालाई पक्रेको छ । हिजो बेलुका डुडुवा गाउँपालिका–४ राप्ती पुल नजिकबाट मेड इन यूएसए लेखेको एक थान अटोमेटिक पेस्तोल, सोको एक थान म्याग्जिन, नौ राउण्ड गोली, एक थान खुँडा र दुई थान नोकसहित उनीहरुलाई समातिएको प्रहरीले जनाएको छ ।

पक्राउ पर्नेमा नेपालगञ्ज उपमहानगरपालिका–१८ कारकाँदो बस्ने २९ वर्षीय सुशान्त केसी, सोही उपमहानगरपालिका–१२ कोरियनपुर बस्ने २८ वर्षीय दिपेन्द्र अधिकारी र कैलाली लम्किचुहा नगरपालिका–३ बस्ने ३२ वर्षीय द्वारिका उपाध्याय रहेका छन् ।

प्रहरीका अनुसार पुल नजिकबाट गोली पड्किएको आवाज आएको थियो । त्यसलगतै घटनास्थलमा पुग्दा सुशान्तले चलाएको बाग्मती प्रदेश ०१–०२५ च ३०९७ नम्बरको गाडीलाई जाँच गर्दा सिट पछाडि झोलामा लुकाई राखिएको अवस्थामा उक्त हातहतियार फेला परेको हो ।

प्रहरी कार्यालय वनकट्टीबाट खटिएको प्रहरीले उनीहरुलाई नियन्त्रणमा लिई थप अनुसन्धान गरिरहेको छ ।