करेसाबारीमा लुकाइएका झ्यालका चौकोस सशस्त्रद्वारा बरामद

सर्लाही जिल्लामा सशस्त्र प्रहरी बलले करेसाबारीमा लुकाएर राखेको झ्यालका चौकोस र सालको कोर्रा बरामद गरेको छ । चौकोस अन्दाजी ६० क्युफिट र कोर्रा १० क्युफिट रहेको बताइएको छ ।

ईश्वरपुर नगरपालिका ५ स्थित दश बिघा नजिकै सशस्त्रका पाँच जना र सागरनाथ वन विकास परियोजनाका वन अधिकृतसहितको सात जना गरि १२ जनाको टोलीले उक्त काठ फेला पारेको हो । स्थानीय आशिष सिंहको घर पछाडि करेसा बारीमा लुकाइएका ती काठको मूल्य झण्डै डेढ लाख रुपैयाँ बराबरको रहेको बताइएको छ ।

गस्ति टोलीलाई देख्ने बितिक्कै सिंह फरार भएका थिए । बरामद भएको काठ हिजै राति सागरनाथ वन विकास परियोजनामा बुझाइएको छ ।