ट्रक ड्राइभरको सिटमा ४२ किलो गाँजा

ट्रकमा राखेर ओसारपसार गरिरहेको अवस्थामा मकवानपुर प्रहरीले ४२ किलो गाँजा फेला पारेको छ । गाँजासहित, ट्रक, ट्रकका चालक, सहचालक र ट्रकमा रहेका अन्य दुई जनालाई समेत पक्राउ गरी सार्वजनिक गरिएको छ ।

जिल्ला प्रहरी कार्यालय मकवानपुरका अनुसार इलाका प्रहरी कार्यालय, मनहरीबाट प्रहरी निरीक्षक प्रकाश थापाको कमाण्डमा खटिएको प्रहरी टोलीले गए राति १२ बजे पूर्वपश्चिम राजमार्गको मनहरी गाउँपालिका ६, स्थित सुनाचुरीबाट गाँजा, सवारी साधन र चार जनालाई पक्रेको हो ।

प्रहरीका अनुसार मनहरीबाट चितवनतर्फ जाँदै गरेको ना.६ ख ४४०९ नम्बरको ट्रकलाई रोकी चेकजाँच गर्दा चालक बस्ने सिट पछाडि राखेर ४२ किलो गाँजा चितवनतर्फ लैजान लागिएको फेला परेको हो ।

गाँजासहित चालक मकवानपुर मनहरी गाउँपालिका ६ बस्ने वर्ष ३१ का ईश्वर पाठक, सहचालक मकवानपुर हेटौंडा ११ बस्ने वर्ष २२ को सागर थिङलाई पक्राउ गरिएको छ ।

ट्रकमा सवार नवलपरासी रामग्राम नगरपालिका १२ बस्ने वर्ष ६० को राजेशप्रसाद रौनियार र अर्का ४० वर्षीया रेश्मा भरलाई समेत नियन्त्रणमा लिई अनुसन्धान थालिएको जिल्ला प्रहरी कार्यालय मकवानपुरले जनाएको छ ।