पलकाे निवेदन दमौलीबाट पोखरा, आयो यस्तो आदेश
नाबालिका बलात्कार आराेपमा पुर्पक्षका लागि तनहुँ जेलमा रहेका अभिनेता पल शाहले उच्च अदालत पोखरामा दर्ता गरेको रिट निवेदनमाथि आज पहिलो सुनुवाई भएकाे छ । जिल्ला अदालत तनहुँले धराैटीमा रिहाइकाे आदेश नदिएपछि त्यसविरुद्ध उनी पुनरावेदनका लागि उच्च अदालत पुगेका थिए ।
प्रहरीले अनुसन्धान प्रतिवेदनसहित पललाई सरकारी वकिल कार्यालयमा बुझाएकाे थियाे । सरकारी वकिलले अदालतमा मुद्दा दर्ता गरेकाेमा अदालतले थप अनुसन्धानकाे लागि पुर्पक्षमा पठाउने आदेश दिएकाे हो । जिल्ला अदालतकाे आदेशबाट असन्तुष्ट उनले उच्च अदालतमा निवेदन दिएका हुन् ।
पलले आफू बाहिरै बसेर मुद्दा लड्न पाउनुपर्ने माग गरेका छन् । आजको बहसपछि अदालतले तनहुँ जिल्ला अदालतबाट कैफियत प्रतिवेदन माग गरेकाे सूचना अधिकारी विष्णुप्रसाद आचार्यले बताएका छन् ।
निवेदन दिए पनि थप अनुसन्धान विना आदेश दिन नमिल्ने उनले बताए । तनहुँ अदालतले दिएकाे थुनछेककाे आदेश र आदेश जारी गर्दाकाे प्रतिलिपी, प्रमाण माग गरेकाे उनकाे भनाइ छ ।
तनहुँ अदालतकाे आदेशबारे निर्क्याैल गर्न पुनःबहस हुनेछ । पललाई १० चैतमा पुर्पक्षका लागि थुनामा पठाउन आदेश दिइएको थियो ।
टिप्पणीहरू