मान्यज्यू भ्रष्टाचारको आरोपमा निलम्बन,बलात्कारमा फुक्काफाल

सडक,पुललगायतका ठूला परियोजनाको ठेक्का लिने,समयमा काम फत्ये नगर्ने,गरे पनि टापटिप पारेर सरकारी ढुकुटी मास्ने पप्पु कन्स्ट्रक्सन प्रख्यातभन्दा पनि कुख्यात कम्पनीको रुपमा चर्चित छ । राजधानीमै तीनकुने नजिकैको बागमती पुलसहित कालिमाटी र टेकु जोड्ने पुलको दुर्दशा त्यहि कम्पनीले गराएको हो ।

हरिनारायण रौनियार उक्त कम्पनीका मालिक हुन् । उनी प्रतिनिधिसभामा सांसद पनि छन् । उनै रौनियारविरुध्दको भ्रष्टाचार मुद्दामाथि सोमबार सर्वोच्च अदालतमा बहस भएको थियो । उनी यसअघि भ्रष्टाचारको मुद्दामा डामिएकाले सांसद पदबाट निलम्बित छन् ।

सर्वोच्चमा हालिएको मुद्दामा रौनियारले आफूलाई निलम्बन गर्न नमिल्ने जिकीर लिएका छन् । आफू मुलुकको विशिष्ट संवैधानिक अंगको मान्छे भएकाले कर्मचारीसरह मुद्दा चल्नेबित्तिक्कै निलम्बन गर्न नमिल्ने उनको जिकिर छ । अस्ति पनि उनले ‘कर्मचारी र म एउटै हैसियतको होइन,संवैधानिक निकायको सांसद हुँ,’ भनेका थिए । तर पनि उनको अनुनयलाई सर्वोच्चले एउटा कानले सुनेर अर्को कानले उडाइदिएको छ ।

‘सांसद भ्रष्टाचारको आरोपमा स्वतः निलम्बित हुन्छ,बलात्कारमा हुँदैन, कानुन नै त्यस्तै छ ।’

कामु प्रधानन्यायाधीश दिपककुमार कार्की र न्यायाधीश नहकुल सुवेदीको इजलासमा परेको उक्त मुद्दामा अदालतले अख्तियारले मुद्दा चलाएपछि स्वतः निलम्बन हुने आदेश सुनाएको छ । सो सङ्गै उनले हालेको रीट खारेज भएको छ ।

रौनियारको तर्फबाट चर्तित कानुन व्यवसायीहरुले बहस गरेका थिए । शम्भु थापा,चन्द्रकान्त ज्ञवाली,सूर्य कोइरालालगायत झण्डै एक दर्जन वकिलले रौनियारको पक्षबाट बहश गरेका थिए ।

संवैधानिक अंगका पदाधिकारी, सांसद,अदालतका न्यायाधीश र सरकारी कर्मचारीविरुध्द भ्रष्टाचारसम्बन्धी मुद्दा दायर गरिनेबित्तिक्कै निलम्बन हुने कानुनी व्यवस्था छ । तर बलात्कारविरुध्दको मुद्दामा भने सांसद निलम्बित हुने कुनै नियम छैन । एक जना कानुन व्यवसायी भन्छन्, ‘सांसद भ्रष्टाचारको आरोपमा स्वतः निलम्बित हुन्छ,बलात्कारमा हुँदैन, कानुन नै त्यस्तै छ ।’