देउवालाई सम्झाउन काठमाडौं आएका काँग्रेसीजनले आफैँलाई सम्झाउनुपर्ने भयो

जन आस्था

चैत ३०, २०७८

चुनावी तालमेलमा पोखरा महानगरको मेयर नछाड्न प्रधानमन्त्री तथा सभापति शेरबहादुर देउवालाई खबरदारी गर्न काठमाडौं आइपुगेको नेपाली काँग्रेस कास्कीको टोली बालुवाटारमै अड्किएको छ । प्रधानमन्त्री देउवाको कार्यव्यस्तताका कारण भेट नपाएपछि टोलि बालुवाटारमा कुरेर बसेको हो ।

बिहानै ९ बजे बालुवाटार पुगेका उनीहरु प्रधानमन्त्रीलाई भेट्न १ बजेसम्म बालुवाटारमा कुरेर बसे पनि भेट्न पाएका छैनन् । काँग्रेस कास्कीका सभापति किशोरदत्त बरालसहित पूर्वमन्त्री यज्ञबहादुर थापा, प्रदेश सरकारका मन्त्री विन्दुकुमार थापा, मेयरका आकांक्षीसहित ६० जनाभन्दा बढी नेताहरु बालुवाटारमा भेला भएका छन् ।

तर प्रधानमन्त्रीको क्याबिनेट र अन्य जरुरी कामका कारण समय नपाएको थापाले बताए । उनका अनुसार २ बजे पार्टी कार्यालय सानेपामा भेट्ने भनिए पनि उनीहरूले समय पाइसकेका छैनन् ।

सत्तारुढ गठबन्धनको केन्द्रीय सहमतिअनुसार पोखरा महानगरको मेयर एकीकृत समाजवादीले पाउने सम्भावनाको चर्चा छ । त्यसको विरोध गर्न पोखरेली नेताहरु हिजो पोखराबाट कस्सिएर काठमाडौं उत्रिएका हुन् । काँग्रेस बाहेक अरु पार्टीले पोखरामा चुनाव जित्न नसक्ने रिपोर्टिङ प्रधानमन्त्रीलाई सुनाएर खबरदारी गर्ने उनीहरुको तयारी छ ।

यसअघि भरतपुर महानगर नछाड्न दबाब दिन भन्दै चितवन काँग्रेसको टोली पनि त्यसैगरी काठमाडौं आएको थियो । सभापति देउवा, वरिष्ठ नेता रामचन्द्र पौडेल, महामन्त्री गगन थापा, नेता शेखर कोइरालालगायतका केन्द्रीय नेताहरुलाई भेटेर टोलीले भरतपुरमा मेयर छाडे बागी उम्मेदवारी दिने चेतावनी सुनाएर चितवन फर्किएको थियो ।

केन्द्रमा देखिएको यो विवाद जिल्ला तहमा झन् धेरै चर्किएको छ । कोइराला पक्षीय नेता सभापति भएका कतिपय जिल्लामा चुनावी तालमेल भए विद्रोह हुने देखिएको छ ।देउवालाई सम्झाउन काठमाडौं आएका काँग्रेसीजनले आफैँलाई सम्झाउनुपर्ने भयो

काँग्रेसमा चुनावमा तालमेल गर्ने विषयमा नेताहरुबीच एकमत छैन । सभापति देउवा, वरिष्ठ नेता पौडेल, नेता कृष्ण सिटौला तालमेलको पक्षमा छन् भने महामन्त्री थापा, नेता कोइराला भने काँग्रेस एक्लै चुनाव लड्नुपर्ने पक्षमा छन् । केन्द्रमा देखिएको यो विवाद जिल्ला तहमा झन् धेरै चर्किएको छ । कोइराला पक्षीय नेता सभापति भएका कतिपय जिल्लामा चुनावी तालमेल भए विद्रोह हुने देखिएको छ ।