चुनावमा उठ्नेलाई नाम झिक्न विप्लवको पार्टीबाट अर्को निर्देशन

चुनावमा सहभागितालाई लिएर चर्को विवादमा फसेको नेत्रविक्रम चन्द विप्लव नेतृत्वको नेकपामा उम्मेदवारी मनोनयनसँगै थप कलह मच्चिएको छ । पार्टी नीतिविपरित संस्थापन पक्षले हिजो उम्मेदवारी मनोनयन गराएको भन्दै सचिवालय सदस्य धर्मेन्द्र बाँस्तोला कन्चनले असन्तुष्टी जनाएपछि आन्तरिक विवादले कलह निम्त्याएको हो ।

विप्लव समूहको हालै सम्पन्न केन्द्रीय कमिटी बैठकले चुनावमा जाने औपचारिक निर्णय गरेको थिएन । जम्माजम्मीमा परिस्थितिको आकलन गर्नेसम्म कुरा थियो । निर्णय पार्टीले आधिकारिक उम्मेदवार नउठाउने र कतिपय ठाउँमा स्वतन्त्र उम्मेदवारी दिनसक्ने सम्मको कुरा थियो । साथै,देशभक्त र एमसीसीविरोधी उम्मेदवारलाई पार्टीले समर्थन गर्नसक्ने पनि बैठकको निर्णय थियो ।

तर,सो निर्णयविपरित संस्थापन (विप्लव-प्रकाण्ड) पक्षले केही स्थानीय तहमा उम्मेदवार उठाएपछि बाँस्तोलाले औपचारिक रुपमै विज्ञप्ति निकालेर विरोध जनाएका हुन् । पार्टीको नीति विपरित दर्ता गरिएका उम्मेदवारी फिर्ता लिन पनि उनले आग्रह गरेका छन् ।

गत चैतमा कपिलवस्तुमा सम्पन्न विप्लव समूहको आठौँ केन्द्रीय समिति बैठकमा महासचिव विप्लवले स्थानीय तहको निर्वाचन उपयोग गर्ने प्रस्ताव पेश गरेका थिए । तर,असहमतिको स्वर आएपछि उक्त प्रतिवेदन संशोधनसहित पास भएको थियो ।

बाँस्तोलासहित अर्का सचिवालय सदस्य हेमन्तप्रकाश वलीलगायत दर्जन केन्द्रीय सदस्यहरु चुनावमा जाने विप्लवको प्रस्तावको विपक्षमा उभिएका थिए ।