राजधानीसँगैको जिल्लामा गठबन्धनमाथि धाँधलीको आरोप, पुनः मतदानको माग

धादिङको खानीखोला गाउँपालिकामा आज भएको मतदानमा सत्ता गठबन्धनका दलहरुले धाँधली गरेको आरोप लगाउँदै एमालेले पुनः मतदानको माग गरेको छ । गाउँपालिकाको वार्ड नम्बर ३ मा रहेको भृकुटी मावि मतदान केन्द्रमा गठबन्धन दलहरुले एक्लौटी ढंगले मतदान केन्द्र कब्जा गरि मतदान गराएको एमालेको आरोप छ ।एमाले खानीखोला गाउँपालिका कमिटीले आज साँझ जारी गरेको विज्ञप्तिमा भनिएको छ, ‘आज भएको निर्वाचन प्रक्रिया रद्ध गर्न अनुरोध छ । साथै सो मतदान केन्द्रमा पुनः मतदान कार्य अघि नबढाएसम्म अन्य मतदान केन्द्रको मतगणना कार्य अघि नबढाउन समेत जोडदार माग गरिन्छ । अन्यथा, निर्वाचनबाट आएको सम्पूर्ण परिणाम अस्वीकार्य र अमान्य हुने व्यहोरा समेत अनुरोध गराइन्छ ।’