गृहमन्त्रीका भाइ उठेका ठाउँमा मतगणना कर्मचारीमाथि धाँधलीको आरोप

रुपन्देहीको तिलोत्तमा नगरपालिकामा मतपत्र गणना गर्ने क्रममा धाँधली गरेको भन्दै मतगणना कार्यमा संलग्न कर्मचारीहरुमाथि आरोप लागेको छ ।

कुनै पार्टीलाई जिताउन राष्ट्रिय जिम्मेवारी बोकेका राष्ट्रसेवक कर्मचारीहरुले नै अत्यन्तै गैरकानुनी र गैरजिम्मेवारी काम गरेकोप्रति माओवादी, नेकपा एकीकृत समाजवादी, जनता समाजवादी पार्टी नेपाललगायतका राजनीतिक पार्टीहरुले ध्यानाकर्षण गराएका हुन् ।

अमूक दलको प्रभावमा परेर मत संकेतलाई गलत रुपमा प्रस्तुत गर्ने, मतपरिणामलाई बङ्ग्याई तोडमोड गरेको उनीहरुको आरोप छ ।

मतदाताले मतमार्फत् दिएको अभिमतलाई जस्ताको त्यस्तै परिणाममार्फत प्रस्तुत गर्नुपर्ने कर्मचारीले कुनै पार्टीलाई जिताउने नियतले काम गरेको विज्ञप्तिमा उल्लेख छ ।

‘अमुक दलबाहेक अन्य दलका मतगणना प्रतिनिधिहरुबाट गल्ती सच्याउन पटकपटक दिएको सुझावलाई पूर्ण रुपमा बेवास्ता गरेकोप्रति हामी निम्नदलहरु घोर भत्र्सना गर्दछौ’ विज्ञप्तिमा भनिएको छ ।

साथै, उनीहरुले राष्ट्रसेवक कर्मचारीलाई यथार्थ छानबिन गरी पुनः मतगणना गर्न जिल्ला निर्वाचन अधिकृत, निर्वाचन आयोगलगायत सम्पूर्ण निकायसँग माग गरेका छन् ।