काँग्रेसभित्र अन्तर्घात भएको प्रवक्ताको भनाइ,काँग्रेस नसच्चिए नयाँ पार्टी खोल्ने मेयरको चेतावनी

नेपाली काँग्रेसका प्रवक्ता डा. प्रकाशशरण महतले स्थानीय निर्वाचनमा पार्टीका उम्मेदवारहरुविरुध्द धेरै ठाउँमा अन्तर्घात भएको बताएका छन् । उनले त्यसका बाबजुद पनि गठबन्धनका कारण अहिले काँग्रेसले धेरै तहमा सफलता प्राप्त गरेको उल्लेख गरेका हुन् ।

पार्टी मुख्यालयमा हिजो आयोजित पत्रकार सम्मेलनमा बोल्दै उनले भने, ‘हाम्रै साथीहरु अन्तर्घातको खेलमा लाग्नुभयो । अन्तर्घात नभइदिएको भए चार सयभन्दा बढी तहमा जितिने रहेछ ।’

अन्तर्घात भएको विषयलाई पार्टीले समीक्षा गर्ने महतले जानकारी दिए । निर्वाचनअघि बागी उम्मेदवार बनेका धेरैजसोलाई कारवाही गरे पनि केन्द्रीय नेताको निर्देशनमा उक्त हर्कत भएको काँग्रेस संस्थापन पक्षको बुझाइ छ । यसवीच जनकपुरमा स्वतन्त्र भएर निर्वाचित मेयर मनोजकुमार साहले मतदातालाई धन्यवाद दिँदै काङ्ग्रेस नसच्चिएमा नयाँ पार्टी खोल्ने चेतावनी दिएका छन् ।

हिजो साँझ घोषणा गरिएको अन्तिम मतपरिणामपछि उनले नेपाली काँग्रेस नसच्चिएमा आफूले नयाँ पार्टी खोल्ने संकेत गरेका छन् ।

मनोज नेपाली काँग्रेसबाट बागी उम्मेदवार उठेर मेयर पदमा विजयी भएका हुन् ।