भोट नहाले पनि स्थानीय चुनाव सम्पन्न भएकोमा राष्ट्रपति औधी खुशी

राष्ट्रपति विद्यादेवी भण्डारीले स्थानीय तह निर्वाचनले लोकतन्त्रलाई जगैदेखि बलियो बनाएको बताउनुभएको छ ।

आर्थिक वर्ष २०७९/०८० को वार्षिक नीति तथा कार्यक्रम प्रस्तुत गर्दै उहाँले लोकतन्त्रको आधारस्तम्भका रुपमा रहेको स्थानीय तह निर्वाचनलाई निष्पक्ष, स्वतन्त्र, शान्तिपूर्ण, स्वच्छ र भयरहित वातावरणमा सम्पन्न भएकोमा खुशी व्यक्त गर्नुभयो ।

राष्ट्रपतिले यसका लागि सरकार र निर्वाचन आयोगलाई धन्यवादसमेत दिनुभएको छ । निर्वाचन सफलतापूर्वक सम्पन्न भएको पृष्ठभूमिमा संसद्को दुवै सदनलाई सम्बोधन गर्न पाउँदा आफूलाई खुशी लागेको उहाँको भनाइ छ ।

निर्वाचनमा जनताको उत्साहपूर्ण सहभागिता र सबै दल सहभागी हुनुलाई राष्ट्रपति भण्डारीले सकारात्मक हो भन्नुभयो । राष्ट्रपति र उपराष्ट्रतिले कुनै पनि निर्वाचनमा मतदान गर्ने संवैधानिक प्रचलन छैन ।