‘ओलीलाई वरिष्ठ नेता बनाएर पुनर्गठन गर कि मर !!’

स्थानीय तहको निर्वाचन परिणामपछि पनि एमालेका एकथरि नेता तथा कार्यकर्तामा मेरो गोरुको बाह्रै टक्का भन्ने बानी छुटेको देखिन्न । पार्टी अध्यक्ष केपी शर्मा ओलीको प्रत्येक बोलीलाई ब्रम्ह वाक्य मान्नेहरुले यसबीच देखिएका कमी कमजोरी सच्चाउने र अघि बढ्नेतर्फ कुनै पहल नै नगरेको गुनासो पनि त्यहीँभित्र बढ्दो छ ।

पार्टी नेता तथा कार्यकर्ताझैँ एमाले निकट लेखक तथा विश्लेषकहरुले पनि देखेको कुरो लेख्न थालेका छन् । त्यस्तैमध्येका हुनुहुन्छ ऋषि आजाद । आजादले अध्यक्ष ओलीको अहमताको कारण एमालेले पछिल्ला दिनमा ठूलो संकट भोग्दै आएको उल्लेख गर्नुभएको छ ।

विशेषगरी पश्चिमाञ्चल र लुम्बिनी प्रदेशमा केन्द्रित राजनीतिको मिहिन ढंगले विश्लेषण गर्ने आजादले सामाजिक सञ्जालमा त्यसबारे लेखेपछि अहिले एमाले पंक्तिले निधार खुम्चाएको बताइन्छ । वामपन्थी र एमालेको आन्तरिक राजनीतिक विश्लेषणमा विशेष खुबी राख्ने बुटवल निवासी आजादले फेसबुकमा एमालेको अधोगति यात्रातर्फ संकेत गर्नुभएको हो ।

एमालेभित्रको पछिल्लो राजनीति र रणनीतिबारे उल्लेख गर्दै लेखिएको छ, ‘आफूलाई चुनौती दिने माधव नेपाल,झलनाथ खनाल, प्रचण्डहरुलाई प्रतिस्पर्धाको मैदानबाट लखेटे,अब घनश्याम भुसाललाई लखेट्ने तयारी छ । भीम रावल मूलधारबाट बाहिर फ्याँकिएका छन् । परिस्थिति गम्भीर बन्दैछ ।’

‘आफ्नो अगाडि शीर ठाडो पारेर फरक मत राख्यो कि पार्टीबाट निकालिदिने मोहनविक्रम सिंह लत्रेर प्युठान जिल्लाको दुई गाउँपालिकामा खुम्चे । ओलीमा पनि ठीक त्यही शैली देखियो ।’

आजादको विश्लेषणअनुसार अध्यक्ष ओलीले कसैले पनि फरक मत राख्न नपाउने गरी पार्टी सञ्चालन गर्न थाल्नुभएको छ । ओलीलाई उहाँले सेनाको जनरलको उपाधी दिनुभएको छ । ओली सैनिक जनरलजस्ता भएकाले पार्टीभित्र वाक स्वतन्त्रता नै नरहेको,फरक मत राखेर बाँच्न गाह्रो भएको एवम् उहाँको दासता र केन्द्रिकृत चिन्तन अबको युगमा कसैले नमान्ने ऋषिको ठहर छ ।

उहाँले लेख्नुभएको छ,‘आफ्नो अगाडि शीर ठाडो पारेर फरक मत राख्यो कि पार्टीबाट निकालिदिने मोहनविक्रम सिंह लत्रेर प्युठान जिल्लाको दुई गाउँपालिकामा खुम्चे । ओलीमा पनि ठीक त्यही शैली देखियो ।’
फेरि पनि एमालेबाट भयानक पैह्रो जाँदैछ भनेर बजारमा हल्ला चलाइएको छ । यस्तो विशाल र अनुशासित पार्टी ओलीकालमा विखण्डन हुने सम्भावना ९० प्रतिशत रहेको उहाँको स्टाटसमा उल्लेख छ ।

त्यहि सन्दर्भलाई जोडेर ऋषिले लेख्नुभएको छ,‘अब ओलीको नेतृत्व रहे यो नित्य,निरन्तर ओरालो लागिरहन्छ र दुई चार वर्षमा नराम्रो परिणाम आउँछ । ईश्वर पोखरेल, शंकर पोखरेलहरु यसमा जिम्मेवार छन् । अब एमाले सत्तामा जाने भन्ने कुरा सदाका लागि हराउँदैछ । यो कुरा मैले ओलीको उदयकालदेखि निरन्तर राख्दै आएको छु ।’

उहाँले एमाले नेताहरुलाई सुझाव पनि दिनुभएको छ । पार्टी जोगाउनको निम्ति ऋषिले ‘ओलीलाई वरिष्ठ नेता बनाएर पुनर्गठन गर कि मर !!,’भन्नुभएको छ ।