अर्थमन्त्री शर्माको जवाफ एमालेले नसुन्ने
प्रमुख प्रतिपक्ष नेकपा एमालेले प्रतिनिधिसभामा आगामी आर्थिक वर्षको निम्ति विनियोजित बजेटबारे अर्थमन्त्री जनार्दन शर्माले जवाफ दिने बैठकमा भाग नलिने चेतावनी दिएको छ ।
आज प्रतिनिधिसभाको बैठकमा बोल्दै एमालेका प्रमुख सचेतक विशाल भट्टराईले बजेटको विषयमा अर्थमन्त्री शर्माले जवाफ दिने कार्यसूची हटाउन माग गर्दै यस्तो चेतावनी दिनुभएको हो ।
उहाँले बजेट निर्माण क्रममा अर्थमन्त्रीले करका दर हेरफेर गर्न अमुक मान्छे मन्त्रालयमा छिराएको भन्ने गम्भिर प्रश्न उठेकाले एमाले अर्थमन्त्रीको जवाफ सुन्न र छलफल गर्न तयार नभएको उल्लेख गर्नुभयो ।
‘अर्थमन्त्रीज्यूको काम र क्रियाकलापमाथि यति गम्भिरतापूर्वक प्रश्न उठेपछि एमाले अर्थमन्त्रीको जवाफ सुन्न र छलफलमा भाग लिन तयार छैन,’ उहाँले भन्नुभयो, ‘आजको कार्यसूचीबाट अर्थमन्त्रीको जवाफ हटाइयोस् । त्यसपछि मात्रै अरु मन्त्रालयहरुसँग सम्बन्धित छलफलमा बस्छौं, छलफल गर्छौं, सभामुखको आग्रह स्वीकार गर्छौं ।’
प्रमुख सचेतक भट्टराईले बैठकको ९ नम्बर सूचीमा रहेको अर्थमन्त्रीले जवाफ दिने कार्यसूची हटाए मात्रै बैठकमा भाग लिने जानकारी दिनुभएको हो ।
टिप्पणीहरू