जंगली च्याउ खाएका दुई बिते, अरुको काठमाडौंमा उपचार हुँदै

ओखलढुंगाको चम्पादेवी गाउँपालिका–७ फूलबारीमा जंगली च्याउ खाँदा एकै घरका दुई जनाको ज्यान गएको छ । मृत्यु हुनेमा ९३ वर्षीया मनमाया विष्ट र २४ वर्षीया ढककुमारी लामिछाने हुन् ।

ढककुमारीको ओखलढुंगा सामुदायिक अस्पताल मिसनमा र मनमायाको त्रिवि शिक्षण अस्पतालमा उपचारका क्रममा मृत्यु भएको जिल्ला प्रहरी कार्यालय ओखलढुंगाका प्रहरी निरीक्षक देवेन्द्र दासले बताए ।

च्याउ खाएर गम्भीर बिरामी भएका २७ वर्षीय राजन विष्ट र उनकी तीन वर्षीया छोरी सरिस्मा विष्टलाई थप उपचारको निम्ति नेपाली सेनाको हेलिकप्टरबाट शिक्षण अस्पताल काठमाडौं पठाइएको प्रहरीले जनाएको छ ।

उनीहरूले कुन किसिमको च्याउ खाएको भन्नेबारे अझै थाहा नभएको निरीक्षक दासले बताए ।