अघिल्लो दिन भरिभराउ बालकोटमा भोलिपल्ट सुनसान

राष्ट्रिय राजनीतिको एउटा प्रमुख केन्द्रका रुपमा रहेको एमाले अध्यक्ष केपी शर्मा ओलीको निवासमा प्रायः नेताहरुको आउजाउ बाक्लै हुने गर्छ । औपचारिक बैठकदेखि अनौपचारिक भेटघाट त्यहिँ हुने भएकाले भक्तपुरको बालकोटस्थित ओली निवासमा पार्टीका नेता, देश तथा विदेशका पाहुना र एमाले कार्यकर्ताको आउजाउ बाक्लो हुने गरेको हो ।

मञ्चमा उक्लिएपछि घण्टौं भाषण गरे पनि प्रतिकूल स्वास्थ्य अवस्थाका कारण अध्यक्ष ओलीका भेटघाटहरु प्रायः निवासमै हुने गर्छन् । उहाँले विभिन्न देशका राजदूत र विदेशी पाहुनाहरुसँग पनि सामान्यतयाः निवासमा भेटघाट गर्ने गर्नुभएको छ ।

हिजो चिनियाँ कम्युनिष्ट पार्टी (सिपिसी) को विदेश विभागका प्रमुख लिउ चियान्छाओ र ओलीबीच बालकोटमै भेटवार्ता भएको थियो । चार घण्टा लामो भेटवार्तासहित चिनियाँ टोलीको सम्मानमा दिवाभोज आयोजना गरिएकाले दिनभर ओली निवास व्यस्त रह्यो ।

अस्ति दिनभर व्यस्त रहेको ओली निवास हिजो बुधबार भने सुनसान देखियो । मध्याह्न एकछिन एमालेका मधेसी नेता रघुवीर महासेठ झुलुक्क हुनुबाहेक अरु कुनै नेता बालकोटमा देखिएनन् । बालकोट स्रोतका अनुसार महासेठले अध्यक्षसँग डेढ घण्टा कुराकानी गरेका थिए ।