खुल्ला सिमाना नागरिकताको प्रमुख समस्या रहेको नेमकिपाको ठहर

सरकारले नागरिकता विधेयकलाई फाष्ट ट्रयाकबाट पारित गर्ने तयारी गरेसँगै नेपाल मजदुर किसान पार्टीले चर्को आलोचना गरेको छ । नेमकिपाका सांसद प्रेम सुवालले नागरिकता विधेयकलाई फाष्ट ट्रयाकबाट पारित गर्नु देशको हितमा नहुने बताउनुभएको हो । आज प्रतिनिधिसभा बैठकमा बोल्दै उहाँले उक्त कुरा राख्नुभएको हो ।

नागरिकता विधेयकलाई सम्बन्धित समितिमा पठाउनुपर्ने भन्दै सुवालले, ‘यो विषय सार्वभौमसँग सम्बन्धित भएकाले जनतासँगसमेत छलफल गर्नेगरी कार्यसूची बनाउनु जरुरी छ ।’

जन्मको आधारमा दिइएको नागरिकता विदेशीले समेत पाएकाले छानबिन गरी खारेज गर्नुपर्ने नेमकिपाको माग छ । नेपालको नागरिकता समस्या समाधान गर्न खुला सीमा बन्द गर्नुपर्ने सुवालको तर्क छ । ‘खुल्ला सीमाना बन्द गरौं, नागरिकता समस्या समाधान हुन्छ,’ उहाँको भनाइ छ ।

आमा र बुबा दुवै वंशजको नेपाली नागरिक रहेका छोराछोरीलाई मात्र वंशजको आधारमा नेपाली नागरिकता दिनुपर्नेमा नेमकिपाले जोड दिएको हो ।