‘भारतमा चुनाव हार्ने,नेपालमा नागरिकता उफार्ने ?’

राष्ट्रिय जनमोर्चाकी उपाध्यक्ष तथा सांसद दुर्गा पौडेलले भारतमा चुनाव हारेपछि नेपालको सांसद हुन मिल्नेगरी नागरिकता वितरण गर्न नहुने धारणा राख्नुभएको छ । आज प्रतिनिधिसभा बैठकमा बोल्दै उहाँले भारतमा चुनाव हारेपछि यता आउने र नेपालको सांसद हुन नागरिकता लिने काममा रोक लगाउन सचेत गराउनुभएको हो ।

उहाँले नेपालीसँग विवाह गर्ने विदेशी महिलाको हकमा सात वर्षको प्रावधान राख्न माग गर्नुभएको छ । सांसद पौडेलले विदेशी महिला नेपाली पुरुषसँग विवाह गरेर आउनेबित्तिकै नागरिकता दिने प्रावधान हटाउनुपर्ने बताउनुभएको हो । अब पनि सात वर्षको प्रावधान नराखे राष्ट्रियतामा दूरगामी क्षति हुने उहाँको दाबी छ ।

‘अंगीकृत नागरिकता विवाहित महिलाको हकमा ७ वर्षको प्रावधानलाई कायम राखेरै जानुपर्छ,’ पौडेलले भन्नुभयो, ‘अन्यथा हामीले यो नागरिकता दिँदै गर्दा राष्ट्रियतासँग जोडिएको विषयमा गम्भिर हुन सकेनौं भने धेरै ठूलो क्षति भोग्नुपर्ने छ ।’

अंगीकृत नागरिकता सोझै प्रदान गर्नु विधिशास्त्र र कुनै पनि सिद्धान्तले नदिने सांसद पौडेलको भनाइ छ ।