विनोद चौधरीलाई स्थानीय सरकारमा बोलाइयो,हदसम्मको जरिवाना तिराउने तयारी

डलर अर्बपति विनोद चौधरीको ललितपुरको बखुण्डोलस्थित निर्माणाधीन लक्जरियस अपार्टमेण्टका कारण हिजो राति पीडित बनेका आधा दर्जन घरधनी र स्थानीयलाई उचित क्षतिपूर्ति तिराउने आश्वासन महानगरपालिकाले दिएको छ । होटल समिट भएको स्थानमा बनाउन थालिएको चौधरीको समिट अपार्टमेण्टको जग खन्ने क्रममा दुई वटा घर ध्वस्त भएको छ । एउटा छ तले घरको भुईंतल्ला जमिनमुनी भासिएको छ भने आधा दर्जनबढी घरमा क्षति पुगेको छ ।

गैरकानुनी ढंगले अपार्टमेन्ट बनाउन थालिएको र स्थानीयको निजी सम्पत्तिमा क्षति पुर्याएको भन्दै स्थानीय हिजो सबेरैदेखि आक्रोशित छन् । चौधरीविरुद्ध हिजो दिनभर नाराबाजी भएको छ । डलर अर्बपतिको मिचाहा प्रवृत्ति, गैरकानुनी भवन निर्माण प्रक्रियाको विरोधमा स्थानीय उत्रिएपछि सो क्षेत्रमा हिजो बिहानैदेखि ठूलो संख्यामा सुरक्षाकर्मी परिचालन गरिएको छ ।

ललितपुर महानगरले चौधरीको कम्पनीले नियमानुसारको निवेदन, प्रक्रिया र निर्माण स्वीकृति केही पनि नलिई काम थालेकाले महानगरका अधिकारीहरु पनि क्रुद्ध छन् । चौधरीको अपार्टमेण्ट कम्पनीले सहरी विकास मन्त्रालयबाट प्लानिङ परमिट मात्रै लिएको तर महानगरबाट कुनै स्वीकृति नलिएकाले हदैसम्म कारवाहीको निम्ति आज महानगरको कार्यालय पुल्चोकमा बोलाइएको छ । 

महानगर स्रोतले भन्यो, ‘लापरबाहीको पराकाष्ठा भयो । सांसद हुँ भन्नेले नै नियमविरुद्ध निर्माण गर्ने,सर्वसाधारणको उठीबास लगाउने कार्य गरेको देखिन आएकाले वास्तविकता बुझ्न आज बोलाइएको छ । कानुनसम्मत ढंगले उनले स्थानीयलाई चित्त बुझाउनुपर्यो । तर महागनरपालिकालाई बाइपास गरेकाले हदैसम्मको कारबाही र जरिवाना गरिने छ ।’

मेयर चिरिबाबु महर्जनले कारबाही गर्लान् ? भनेर सोधिएको जिज्ञासामा स्रोतले भन्यो, ‘सर्वसाधारणलाई बिचल्ली बनाएको यो इस्युमा उहाँले दायाँबायाँ गर्नुहुन्न । हिजो अनौपचारिक रुपमा मेयरले केही कर्मचारीहरुसँग कुराकानी गर्नुभएको छ ।’ स्रोतले भन्यो, ‘महानगरपालिकाबाट नक्सा पास र अस्थायी स्वीकृति लिएर मात्र भवन निर्माण थाल्नुपर्नेमा सो गरेको पाइएन ।’ 

स्थानीय सरकार सञ्चालन ऐनअनुसार कुनैपनि निर्माणअघि पालिकाबाट अस्थायी स्वीकृति लिनुपर्छ । डिपीसी भएपछि स्थायी निर्माणको स्वीकृति लिनुपर्नेमा उक्त अपार्टमेण्ट निर्माणमा कानुनको गम्भीर उल्लंघन भएको छ ।