पर्सि बोलाइएको संवैधानिक परिषद् बैठक सिंहदरबारमा बस्यो, प्रधानन्यायाधीश नियुक्ति मुख्य एजेण्डा

सिंहदरबारस्थित प्रधानमन्त्री तथा मन्त्रिपरिषद्को कार्यालयमा संवैधानिक परिषद्को बैठक बसेको छ । प्रधानमन्त्री पुष्पकमल दाहाल ‘प्रचण्ड’को अध्यक्षतामा बैठक बसेको बताइएको छ ।

बैठकमा प्रधानन्यायाधीश नियुक्तिको विषय मुख्य एजेण्डा रहेको स्रोतको दाबी छ । अस्ति बिहान एमाले अध्यक्ष केपी शर्मा ओलीको निवास बालकोटमा प्रधानमन्त्री पुष्पकमल दाहाल ‘प्रचण्ड’ र नेपाली काँग्रेस सभापति शेर बहादुर देउवासहितको बैठकले प्रधानन्यायाधीश नियुक्ति प्रक्रिया थाल्न संवैधानिक परिषद्को बैठक बोलाउने निर्णय गरेको थियो । 

प्रधानमन्त्रीले उक्त बैठक शुक्रबार बोलाउनुभएको थियो । तर आज आकस्मिक रुपमा बैठक बसेको हो । बैठकमा प्रतिनिधि सभाका सभामुख देवराज घिमिरे, उपसभामुख इन्दिरा राना, राष्ट्रिय सभाका अध्यक्ष गणेश प्रसाद तिमिल्सिना, उपप्रधानमन्त्री तथा रक्षा र कानुनमन्त्री पूर्णबहादुर खड्का, एमाले अध्यक्ष ओली उपस्थित हुनुहुहन्छ । 

यता, राष्ट्रिय सभाका अध्यक्ष गणेशप्रसाद तिमिल्सिना आज रुसको राजधानी मस्को जाँदै हुनुहुन्छ । उहाँ आठ सदस्यीय प्रतिनिधि मण्डलको नेतृत्व गर्दै आज बिहान साढे १० बजे त्यता जान लाग्नुभएको हो । उहाँ रुसको माथिल्लो सदनका अध्यक्ष भ्यालेन्टिना मात्भिएन्कोको निमन्त्रणमा त्यता जान लाग्नुभएको संसद सचिवालयले जनाएको छ ।