सशस्त्र प्रहरी बल नेपालका हाकिमहरुको लापरबाहीका कारण दुई दर्जन पत्रकारको झण्डै ज्यान गएको छ । गत शुक्रबार सुनसरीको पकलीमा आयोजित गोताखोर तालिममा आयोजक र आमन्त्रित पत्रकारहरुको असावधानीका कारण ठूलो दुर्घटना भए पनि मुश्किलले टरेको थियो ।
तत्काल उध्दार भएकाले एक जनाबाहेक अरु सबै उपचारपछि भोलिपल्ट घर फर्केका थिए । कात्तिक १७ गते चतरामा तालिमको अन्तिम प्रवचन राखिएको थियो । कोशीका मुख्यमन्त्री केदार कार्की प्रमुख अतिथि थिए । साँझ नदीमा डुबेर घाइते भएका पत्रकारहरुलाई भेट्न उनी बिपी कोइराला अस्पताल धरान पुगे पनि ।
डुबेकामध्ये धेरैजसो पूर्वका प्रेस युनियन निकट पत्रकारहरु हुन् । सुनसरी र मोरङका उनीहरुलाई डुंगा चढाउँदै उदयपुरतर्फको किनारमा पुर्याइएको र बिहान तालिमस्थलसम्म उनीहरुलाई सशस्त्र प्रहरीको गाडीमा हालेर लगिएको थियो ।
नदीमा डुबेर मुश्किलले बाँचेका पत्रकारहरुमा कान्तिपुर टेलिभिजनका विराटनगर सम्वाददाता महाप्रसाद खतिवडा, क्यामरा पर्सन शम्भु पोखरेल, कान्तिपुर दैनिकका देवनारायण साह,रेडियो नेपालका कुमुद अधिकारी,जितेन्द्र ठाकुरलगायत छन् ।
गोताखोर तालिमको प्रमुख डिएसपी वीरेन्द्र खनाल थिए । उनै तालिम संयोजक रहेको बताइन्छ । बढीमा आठ जना चढ्नुपर्ने डुंगामा २२ जनालाई हालिएपछि दुर्घटना भएको प्रत्यक्षदर्शीहरुको भनाई छ ।
स्रोत भन्छ, ‘२२ जनालाई डुंगामा हालेर कोशीपारि लगियो । पत्रकारहरुले लाइफ ज्याकेट पनि लगाएका थिएनन् । त्यो दिन उक्त डुंगा नियमित रुपमा चलाउने गोताखोरले खियाएका थिएनन् ।’ उदयपुरतर्फ पुगेका दुई दर्जन पत्रकार कार्यक्रममा मुख्यमन्त्री आइपुगेको थाहा पाएपछि हुर्हुराउँदै सुनसरीतर्फ आउँदा दुर्घटना भएको बुझिएको छ ।
सरसर्ती हेर्दा पत्रकारहरुको जोड र कार्यक्रम संयोजक डिएसपी खनाल एवम् उनीभन्दा माथिका हाकिमहरुको लापरबाहीले दुर्घटना भएको देखिन आएको बताइन्छ । कथम् कसैको ज्यान गएको भए डिआइजीको जागिर स्वतः धरापमा पथ्र्यो । डिआइजी अञ्जनीकुमार पोख्रेल उक्त तालिम कार्यक्रमको जिम्मेवारीका हिसाबले उपल्लो तहका अधिकारी हुन् ।
नदीमा डुबेर मुश्किलले बाँचेका पत्रकारहरुमा कान्तिपुर टेलिभिजनका विराटनगर सम्वाददाता महाप्रसाद खतिवडा, क्यामरा पर्सन शम्भु पोखरेल, कान्तिपुर दैनिकका देवनारायण साह,रेडियो नेपालका कुमुद अधिकारी,जितेन्द्र ठाकुरलगायत छन् । मोटो शरीरका अधिकारीले डुबेर नदीको पानी खाएकाले दुई दिन अस्पतालमा बसेको बताइन्छ । अरु भने एक रात अस्पताल बसेर घर गएका थिए ।
नदीमा डुबेका सबैको क्यामरा, मोबाइल,रेकर्डर सञ्चारसामाग्री कोशीमा बगेको छ ।
