नीजि सम्पत्तिमाथिको अधिकारमा अतिक्रमण गरेको आरोपमा मेयरविरूद्ध पक्राउ आदेश

बूढानीलकण्ठ नगरपालिका मेयर मिठाराम अधिकारीसहित तीन जनालाई पक्राउ गर्न अदालतले आदेश दिएको छ । काठमाडौँ जिल्ला अदालतका न्यायाधीश डा. राजेन्द्र कुमार आचार्यको इजलासले मेयर अधिकारीसहित वडा नम्बर १० का अध्यक्ष नवराज भट्टराई, सदस्य चन्द्रमान श्रेष्ठ र वडा नम्बर ८ का अध्यक्ष सुमन तामाङलाई एक महिनाको कैद सजाय सुनाएको छ । 

स्थानीय एकजना ज्येष्ठ नागरिकले आफ्नो जग्गालाई नगरपालिकाले बलजफ्ती कब्जा गरेको र त्यसमा संरचना बनाइदिएको भन्दै ०७७ भदौ ३० गते निवेदन दिएका थिए । उक्त मुद्दामा अदालतले उक्त आदेश गरेको हो । 

अदालतले मुलुकी देवानी कार्यविधि संहिता २०७४ को दफा २३८(१६) अनुसार प्रतिवादीहरूलाई जनही १ महिना कैद सजाय तोकेको प्रष्ट पार्दै भनेको छ, ‘पालिकाले निवेदकको सम्पत्ति सम्बन्धी हक अधिकारलाई अतिक्रमण गरेको  देखिन आएको छ । यसो गर्ने अधिकार राज्यको हुँदैन, प्रतिवादीले अदालतको फैसलाको सम्मान नगरी अदालतको फैसलाको नै अवज्ञा गरेको समेत देखिन आएको छ ।’ 

कैदको हकमा प्रतिवादीहरुले ६० दिनभित्र संरचना हटाइ निवेदक एवम् वादीलाई चलन दिइ कब्जा छाडि दिएको प्रतिवेदन पेश गरेमा उक्त कैद असुल गर्न नपर्ने पनि फैसलामा उल्लेख गरिएको छ । ‘प्रतिवादीहरूले ६० दिनमा संरचना हटाई नलगेमा अदालतबाट संरचना हटाई दिन लाग्ने खर्च प्रतिवादीहरुमध्ये बूढानीलकण्ठ नगर पालिकाबाट असुल गर्नू’, फैसलामा भनिएको छ ।