‘लिटिल बुद्ध’ लाई बाल यौन शोषण मुद्दामा १० वर्ष कैद

आफूलाई ‘लिटिल बुद्ध’ दाबी गर्दै आएका रामबहादुर बमजनलाई १० वर्ष कैद र पाँच लाख क्षतिपूर्तीको सजाय सुनाइएको छ । 

जिल्ला अदालत सर्लाहीका न्यायाधीश जीवनकुमार भण्डारीको इजलासले आज बमजनविरुद्ध यस्तो फैसला सुनाएको हो । 

असार १० गते उनी बाल यौन शोषण मुद्दामा दोषी ठहर भएका थिए । सजायको लागि आज पेशी तोकिएको थियो । बहसका क्रममा सरकारी वकीलको कार्यालयले बमजनलाई २० वर्षको जन्मकैद हुनुपर्ने माग गरेको थियो । तर, अदालतले आधा मात्र सजायको फैसला सुनाएको हो । 

बमजनमाथि आफ्नै आश्रमका दुई आनी र तीन बालक बेपत्ता बनाएको, विभिन्न ठाउँमा बालिकाहरुमाथि यौन शोषण गरेको आरोप थियो । उनी गत पुस २४ गते बूढानीलकण्ठ नजिकै घरबाट पक्राउ परेका थिए । प्रहरीले उनको घरबाट तीन करोड नेपाली रुपैयाँ र ४० लाख बराबरको विदेशी मुद्रासमेत फेला पारेको थियो ।