ताप्लेजुङ गोल्ड कपको फाइनलमा सगरमाथा युथ क्लब मोरङ

दोस्रो ताप्लेजुङ गोल्ड कप २०८१ को सेमिफाइनलको पहिलो खेलमा विजयी सगरमाथा युथ क्लब मोरङ फाइनलमा पुगेको छ । हिजो भएको खेलमा संघर्ष स्पोर्टिङ क्लब ताप्लेजुङलाई १ का विरुद्ध २ गोल गरेर मोरङले फाइनलका लागि स्थान सुरक्षित गरेको छ ।

खेलको प्रारम्भमै मोरङविरुद्ध १ गोल गरेको ताप्लेजुङले पूरै समय त्यसैमा चित्त बुझाउनुपरेको थियो । हाफटाइमपछि सगरमाथा युथ क्लब मोरङले पनि १ गोल गरेर बराबरीमा पुर्यायो । निर्धारित समयपछिको खेलमा गरेको १ गोलले उक्त टिम विजयी भएको हो ।

आयोजकहरुका अनुसार पछिल्लो चार दिनको खेलमा दर्शकहरुबाट सात लाख नौ हजार ८०० सय उठेको छ । हिजोको सेमिफाइनलदेखि टिकटको मूल्य दुई सय तोकिएको हो ।

आज हुन लागेको दोस्रो सेमिफाइनलमा बिर्तामोड युनाईटेड फुट्बल क्लब झापा र सलहेश युवा क्लब सिरहाबीच प्रतिस्पर्धा हुँदै छ । पर्सि सोमबार फाइनल खेलको तालिका छ ।