‘ताक परे तिवारी’ को शैलीमा अपहरणको नाटक गरेका भरत प्रहरी खोरमा

नमस्कार शाह

बाँकेमा आफू अपहरणमा परेको खबर दिने एक युवक अन्ततः प्रहरी फन्दामा परेका छन् । आफूलाई अरु कसैले अपहरण गरेको खबर गरेर प्रहरीलाई दुःख दिएक ती युवकविरुद्ध प्रहरीले उपद्रवको मुद्दा अघि बढाएको छ । 

अपहरणको नाटक गरेका भरत तिवारीलाई प्रहरीले पक्राउ गरेपछि उपद्रवको मुद्दा चलाएको हो । उनले प्रहरीसहित आफन्त, साथीहरुलाई सास्ती दिएका थिए ।

नेपालगञ्ज उपमहानगरपालिका ११ का २६ वर्षीय तिवारीले ह्वाट्सएपबाट साथीहरुलाई आफू अपहरणमा परेको म्यासेज पठाएर सहयोगका लागि अनुरोध गरेका थिए । गत साउन ३० गते आफ्नै ह्वाट्सएप नम्बरबाट साथीहरुलाई आफू अपहरणमा परेको म्यासेज गरेपछि उनीहरुले प्रहरीलाई खबर गरेका थिए । 

सोही सूचनाका आधारमा प्रहरीले खोजतलासको निम्ति प्रहरी परिचालन गर्यो । उनले आफू अपहरणमा परेको र आफ्नो मोटरसाइकल नेपालगञ्जको न्यूरोडमा रहेको म्यासेज पठाएका थिए ।
सोही राति १० बजेतिर भरतले प्रहरीलाई फोन गरेर आफू भागेर डुडुवाको कम्दीस्थित खेतको बीचमा भागेर पुगेको बताएपछि प्रहरी टोली तत्काल त्यहाँ पुगेको थियो । उद्धारका लागि त्यहाँ पुगेको प्रहरीले उनलाई जिल्ला प्रहरी कार्यालयमा पुर्यायो । त्यसपछि प्रहरी टोलीले उनले दिएका तीन वटा ह्वाट्सएप आईडी तिवारीकै मोबाइलमा फेला पार्यो । 

प्रहरीका अनुसार तिवारीले आफ्नो मोबाइलमा राखिएको नयाँ नम्बरबाट ह्वाट्सएप खोलेर साथीहरुलाई आफू अपहरणमा परेको कुरा सोही ह्वाट्सएप मार्फत् जानकारी गराएको तथ्य खुलेको हो । तिवारीले आफैंले अपहरणको म्यासेज पठाएर अनावश्यक दुःख दिएको पुष्टि भएपछि उनलाई उपद्रवको मुद्दा चलाइएको प्रहरीले जनाएको छ ।

यसअघि उनी आफूलाई धर्मगुरु भन्दै कथा, प्रवचन गर्दै हिँडेको स्थानीयले बताए ।