चर्को आवाजमा मोटरसाइकल कुदाउनेको फोटो पठाउनेलाई पुरस्कार
काठमाडौंको गोकर्णेश्वर नगरपालिकाले चर्को ध्वनीमा मोटरसाइकल कुदाउनेको फोटो खिचेर पठाउने व्यक्तिलाई पाँच हजार रुपैयाँ पुरस्कारको घोषणा गरेको छ । नगरभित्र मोटरसाइकलको साइलेन्सर मोडिफाईको नाममा ध्वनी प्रदूषण गर्ने क्रम बढेपछि नगरपालिकाले नयाँ जुक्ति निकालेको बताइन्छ ।
त्यसरी ध्वनी प्रदूषण गराउने सवारी चालक र मोटरसाइकल नम्बरसहितको फोटो तथा विवरण पठाउने व्यक्तिलाई पाँच हजार रुपैयाँ प्रोत्साहनस्वरुप उपलब्ध गराउने निर्णय गरिएको छ । जारी सूचनामा त्यस्तो विवरण उपलब्ध गराउने व्यक्तिको परिचय गोप्य राखिने उल्लेख छ ।
‘केही मोटरसाइकल सवारी चालकले सवारीको साइलेन्सर मोडिफाई गरी चलाउने गरेको पाइएकोले उक्त कार्य गर्ने सवारी चालकको मोटरसाइकल नम्बरसहितको फोटो तथा विवरण ९८५१२९६३१२ मा उपलब्ध गराउने व्यक्तिको विवरण गोप्य राखिने र उक्त व्यक्तिलाई नगरपालिकाबाट पाँच हजार रुपैयाँ प्रोत्साहनस्वरुप दिइने सूचित गराइन्छ,’ सूचनामा भनिएको छ ।
टिप्पणीहरू