नयाँ दिल्लीबाट काठमाडौं आउँदै गरेको विमानमा बमकाे चेतावनी

भारतको राजधानी नयाँ दिल्लीबाट काठमाडौंका लागि उडेको भिस्तारा एअरको विमानमा बम रहेको चेतावनीपछि सकुशल काठमाडौं ल्याइएको छ । नयाँ दिल्लीबाट पौने ३ बजे उडेको भिस्तारा एअरको उडान नम्बर युके १५५ विमान साढे ४ बजे त्रिभुवन अन्तर्राष्ट्रिय विमानस्थलमा सुरक्षित अवतरण गरेको छ । 

दिउँसो २ बजे उड्नुपर्ने विमान पौने ३ बजे प्रस्थान गरेको थियो । नयाँ दिल्लीबाट उडेको २० मीनेटपछि विमानमा बम रहेको खबर चालक दलका सदस्यलाई दिइएको बताइन्छ । 

१५७ जना यात्रु रहेको विमानलाई विशेष तालिमप्राप्त कुकुरबाट चेक गराइएको छ । नेपाली सेनाको बम डिस्पोजल टोली पनि विमानस्थल पुगेको छ ।

काठमाडौं आइरहेको विमानमा बम रहेको हल्ला हुँदा त्रिभुवन विमानस्थलमा सुुरक्षा कमिटीको बैठक बसिरहेको थियो । हवाई सुरक्षा नियन्त्रक बच्चुराम श्रेष्ठलाई बैठक चलिरहेको समयमा एअर ट्राफिक कन्ट्रोलरले बमको चेतावनी प्राप्त भएको खबर गरेका थिए ।