भाषाका माध्यमबाट चीन चिनाइँदै

विश्व बजारमा छिमेकी चीनको प्रभाव विस्तार हुँदै गएका बेला नेपालमा चिनियाँ भाषाप्रतिको आकर्षण बढेको छ । विभिन्न बिद्यालय र विश्वविद्यालयले लागू गरेको चिनियाँ भाषा कार्यक्रममा पछिल्लो समय नेपालीहरुको दिलचस्पी विस्तार भएको देखिन्छ । 

सीमाना जोडिएको मित्रराष्ट्र चीनसँग व्यापार,पर्यटन,शिक्षा,सँस्कृति,कला,सञ्चारलगायत जनस्तरको सम्बन्ध थप कसिलो हुँदै गएकाले चिनियाँ भाषा अध्ययनका लागि धेरै प्रेरित भएको पाइन्छ । यसै सन्दर्भमा नेपालमा लामो समयदेखि चिनियाँ भाषाको प्रवर्धन गर्दै आएको कन्फ्युसियस इन्स्टिच्युटले २०औँ स्थापना दिवस मनाएको छ । 

ललितपुरको ज्यापु समाजमा आज विशेष कार्यक्रम आयोजना गरी स्थापना दिवस मनाइएको हो । कार्यक्रममा बोल्दै चीनका मित्रहरूले नेपालमा चिनियाँ भाषाको आकर्षण बढेकोमा खुशी व्यक्त गरे । दुई देशको सम्बन्धलाई थप प्रगाढ बनाउँदै जनस्तरसम्म पुर्याउन भाषा र सञ्चार महत्वपूर्ण हुने बताउँदै उनीहरुले त्यसनिम्ति इन्स्टिच्युटले खेलेको भूमिकाको खुलेर प्रशंसासमेत गरेका छन् । 

नेपाल-चाइना मिडिया फोरमका अध्यक्ष किशोर श्रेष्ठले पनि चिनियाँ भाषाप्रति नेपालीहरुमा बढेको रुचिलाई सकारात्मक भनेका छन् । पछिल्लो समय चिनियाँ पर्यटकको वृद्धि भैरहेकाले यसबाट नेपालीले लाभ लिनसक्ने उनको विश्वास छ । त्यस्तै, भाषाकै आधारमा दुई देशका नागरिक आपसमा जोडिंदै गएको श्रेष्ठले बताए । 

कार्यक्रममा ईन्स्टिच्युटका निर्देशक प्रोफेसर डक्टर लि सुआङ्गछङ्ग,नेपाल प्रवासी चिनियाँ संघका अध्यक्ष जिन सियाओडोङ,चाइना सांस्कृतिक केन्द्रकी निर्देशक सियाओ जियाङ,नेपाल स्वयंसेवक शिक्षक संघका अध्यक्ष लिउ युनहाईको उपस्थिति थियो । 

त्यस्तै,ललितपुर महानगरपालिकाका शिक्षा शाखा प्रमुख देवीप्रसाद उपाध्याय, त्रिभुवन विश्वविद्यालयको कन्फ्युसिअस इन्स्टिच्युटका निर्देशक डा.बलराम दुवाल,ज्यापु समाजका अध्यक्ष सन्तमान महर्जन,नेपाल चीन सांस्कृतिक तथा शैक्षिक परिषद्का अध्यक्ष डा.हरिशचन्द्र साह र सिनो नेपाल सांस्कृतिक तथा पर्यटन प्रवर्धन समाजका अध्यक्ष ध्रुव पौडेललगायत पनि उपस्थित थिए । 

स्मरणीय छ,त्रिभुवन विश्वविद्यालय र काठमाडौँ विश्वविद्यालयअन्तर्गत कन्फ्युसियस इन्स्टिच्युटले लामो समयदेखि नेपाली नागरिकका लागि नि:शुल्क चिनियाँ भाषा कार्यक्रम चलाउँदै आएका छन् । कन्फ्युसिअस इन्स्टिच्युट र नेपाल चाइना मिडिया फोरमको आयोजनामा केही दिनदेखि काठमाडौँमा नेपाली पत्रकारका लागि भाषा कक्षा सञ्चालन भइरहेको छ ।

कार्यक्रममा पाठशाला नेपाल,ख्वप:उच्च मावि,माछापुच्छ्रे स्कूललगायतका छात्रछात्राले कला प्रस्तुति दिएका थिए ।