लोकप्रिय पत्रिका जनआस्था साप्ताहिकमा काठमाडौंका पूर्वएसपी इन्द्र न्यौपानेले २०६२ साल मंसिर १६ गते तत्कालीन राजा ज्ञानेन्द्रको सवारी चल्दा भएको ढुङ्गामुढा काण्डको संस्मरणात्मक लेखमार्फत आफूलाई दरवारले कारबाही गरेको र गणतन्त्र आएपछि बल्ल त्यो फुकुवा भएको जिकिर गरेका छन् । सो दिनको घटनाका निम्ति कारबाही गर्नुपर्ने हैसियतमा न्यौपाने थिएनन् । उनीभन्दा माथिल्लो कमाण्डमा धेरै थिए । त्यसो त सो दिन सवारीको सुरक्षा प्रबन्ध संयुक्त कमाण्डले गरेको थियो ।
आइजिपी श्यामभक्त थापा, अपरेशनल एआइजी म राजेन्द्रबहादुर सिंह र एआइजी ओमविक्रम राणा वा अरू कसैले एक्लै जिम्मा लिनुपर्ने अवस्था थिएन । राजाको फिर्ती सवारीको दिन सेना, प्रहरी र सशस्त्र खटिएका थिए । त्यसैले तपाईंले मात्रै किन राजीनामा दिनुपर्ने ? भन्दै मैले छाड्ने मनसाय व्यक्त गरेका आइजिपी थापालाई रोकेको थिएँ । त्यसबाट आइजिपी थापा र एआइजी ओमविक्रम राणाबीच भएको सल्लाहबमोजिम एकाएक इन्द्र न्यौपानेलाई कारबाही गरिएछ ।
त्यसबेलाका गृहसचिव चण्डीप्रसाद श्रेष्ठ जिउँदै छन् । दरवारले कुनै कारबाही नै गरेको होइन । प्रहरी आफैं जान्ने भएको हो । त्यसो त दरवारका संवाद सचिव फणिराज पाठकले उल्टै एसपी न्यौपानेलाई किन कारबाही गरेको भन्दै मलाई सोधेका थिए । त्यसबेला बानेश्वरको सुरक्षा व्यवस्था हेर्न मैले नै अपरेशन एआइजीको हैसियतबाट उनलाई जिम्मेवारी दिई खटाएको थिएँ ।
कारबाही गर्ने नै भए ढुंगामुढा भएको ठाउँमा खटिएका हिम गुरुङमाथि हुुनुपथ्र्यो तर किन न्यौपानेलाई दुःख दिइयो ? मैले भित्री कारण बुझ्न सकेको छैन । त्यसबेलाको मुख्य जिम्मेवार त राजाको एडिसी टीका धमला हो । अगाडि ढुंगामुढा हुँदै छ भनेपछि सवारी रोक्नुपर्ने दायित्व उनकै थियो । अन्य सुरक्षा निकायलाई खबर गर्ने, सूचित गर्ने दायित्व उनकै हो ।
तर, उनले त्यो दायित्व त्यसबेला निर्वाह गरेनन् । जे भए तापनि न्यौपानेलाई गणतन्त्रको सिपाही बनाउने काम भने यसबाट पक्कै भएको छ ।
