५० लाखको कोषलाई बढाएर लिम्बुवान केन्द्रले एक करोड पुर्यायो

लिम्बुवान अध्ययन केन्द्र किरात याक्थुङ चुम्लुङले एक करोड रुपैयाँको प्राज्ञिक कोष खडा गर्ने भएको छ । यसअघिको ५० लाख अपर्याप्त भएपछि दोब्बर गरेर एक करोड पुर्याउन लागिएको बताइएको छ । 

लिम्बुवानसम्बन्धी सबै क्षेत्र र विषयहरुमा सम्बन्धित पक्ष, व्यक्ति वा निकायसँग सहकार्यसँगै साझेदारीमा अध्ययन, अनुसन्धान र प्रकाशन गर्ने उद्देश्यअनुरुप ताप्लेजुङ घर भई हाल क्यानडामा रहेका विष्णुदत्त आङ्बुआङ परिवारको सहकार्यमा २०७३ सालमा ५० लाख रुपैयाँको ‘विष्णुत्त–सरस्वती आङ्बुआङ प्राज्ञिक कोष’ खडा गरिएको थियो । 

कोषबाट वर्षेनी दुई जना महिला र पुरुष अध्येतालाई अनुसन्धानवृत्ति, एक अध्येतालाई विद्धतवृत्ति र प्रत्येक दुई–दुई वर्षमा एक प्रकाशित कृतिलाई प्राज्ञिक पुरस्कार प्रदान गरिँदै आएको छ । यस क्रममा ५० लाख रुपैयाँको कोष रकम अपर्याप्त देखिएपछि बढाउन लागिएको लिम्बुवान अध्ययन केन्दले जनाएको छ । 

केन्द्रका अध्यक्ष भगिराज इङ्नामले कोषदाता आङ्बुआङ परिवारबाटै थप ५० लाख रुपैयाँ बढाएर एक करोडको कोष खडा गर्न थालिएको जानकारी दिए । उनका अनुसार भोलि ललितपुरमा एक कार्यक्रममार्फत गरी सोबारे घोषणा गरिनेछ । 

साथै, ‘विष्णुदत्त–सरस्वती आङ्बुआङ प्राज्ञिक पुरस्कार, २०८१’ स्वर्गीय.कृष्णविक्रम नेम्बाङको लिखित तथा मुन्धुम एकाडेमीबाट प्रकाशित ‘लिम्बु इतिहासः तिब्बती, लेप्चा, कोच, सेन र राय सम्बन्ध (२०८०)’ लाई नियमानुसार एक लाख रुपैयाँ प्रदान गरिने पनि केन्द्रले बताएको छ ।