राजावादी जुलुस रत्नपार्क पुग्दै, सांसदहरु नयाँ बानेश्वर जाने

राजा फर्काउन सडकमा उत्रिएका राजावादीहरु काठमाडौँ उपत्यकाका विभिन्न स्थानमा भेला भएर कार्यक्रमस्थल रत्नपार्कतर्फ अघि बढेका छन् । 

सोह्रखुट्टे, टेकु, चावाहिल, कोटेश्वर लगायत विभिन्न सात स्थानबाट निस्किएको जुलुस टुँडिखेल परिक्रममा गरेर रत्नपार्क पुग्ने बताइएको छ । चावहिलबाट निस्किएको जुलुसको नेतृत्व 'संयुक्त जनआन्दोलन समिति' का संयोजक नवराज सुवेदी र राप्रपा नेपालका अध्यक्ष कमल थापाले गरेका छन् ।

मैतीदेवीबाट निस्किएकाे जुलुसको अगुवाई राप्रपाका राजेन्द्रप्रसाद लिङ्गदेनले गरे भने सोह्रखुट्टेको समूह ज्ञानबहादुर शाही नेतृत्वमा अघि बढेको छ । विक्रम पाण्डे, धवल शमशेर राणाहरु भने कार्यक्रमस्थलमा पुगिसकेका छन् । 

राप्रपाका सांसदहरु प्रदर्शन अवधिभर रत्नपार्कमा रहने छैनन् । आज संसदमा बजेट पेश हुन लागेका लिङ्गदेनसहितका नेताहरु अपराह्न ३ बजे नयाँ बानेश्वरस्थित संसद भवन पुग्ने तयारीमा छन् । 

उता गणतन्त्र दिवसको अवसरमा नेकपा (एमाले)का नेता-कार्यकर्ता पनि नारा जुलुससहित भृकुटीमण्डप पुगेक छन् । त्यहाँ कोणसभापछि कार्यक्रम समापन गर्ने तयारी छ ।